|
عزيز هموطنلر! بيلديگينيز کيمي ايران پارلمنتي نين يئدينجي سئچگيلري عرفه سينده ييک. هر زامان اولدوغو کيمي، اؤلکه ده بو گون ده غير دموکراتيک آتمسفر دوام ائتمکده دير. ائله بونا گؤره ده سئچگيلر مخالفت قووه لري طرفيندن بايکوت ائديليب. آرتيق گيزلي دگيل کي، بو دورومدا بشر حقوقلاري يئنه ده شعارکيمي سسله نيلير. اصلينده ايسه بو جريانلار ميللي حقوقلارا بيگانه دير. آرتيق اسلام حاکميتيندن ۲۵ ايل کئچسه ده هله ده آذربايجان تورکو بشرحقوقلاريندان استفاده ائده بيلمير. گونوموزون بئله بير انکشاف دورونده بو دوروم آذربايجان ميللتي اوچون بؤيوک بير فاجعه دير. بوگون آذربايجان ميللي حرکاتي چئشيتلي تضييقلره معروض قالسادا انکشاف يولوندا دورمادان ايره لي له يير. ايندي قارشيميزدا بير وظيفه دورور. بيز دوزگون سياستله حرکت ائتمه لييک. سئچکيلري پروگرامسيز و تله سيک شکيلده بايکوت ائتمک استراتژيسي گله جکده آذربايجان ميللي حرکاتيني تهليکله ايله قارشيلاشديرار. آرتيق آجي تجربه لر گؤستريب کي، عکس تقديرده بوتون پلانلاريميز اوغورسوزلوقلارلا اؤزله شه بيلر. اونودمامالييق کي، تدبيرسيز حرکت اؤلکه ده کي سياسي و ايجتماعي دورومون داهادا گرگين لشمه سينه شرايط يارادار و بلليکله پان ايرانيست شونيستلري نين قووه لريني داها گوجلنديرر و خارجي قدرتلرين الينه بهانه وئرره بيلر. آذربايجانليلارين مدني و سويل يوللارلا ميللي حقوقلارينا نايل اولاجاغي آرتيق ضروريت داشيير. آذربايجان ميللي جبهه سي ايراندا کئچيريله جک آنتي دموکراتيک سئچکيلري رد ائدير و آزاد سئچيملري دستکله يير. و آذربايجان ميللي حرکاتي نين صلاحيتلي نماينده لري نين خالقيميز طرفيندن سئجيليب، پارلمنته گؤندريلمه سيني آرزو ائدير. عزيز هموطنلر، آذربايجان ميللي جبهه سي امين ديرکي، سويداشلاريميز بو حساس شرايطده بو مسئله يه آييق – ساييقليقلا ياناشاجاقلار. بو اولدوقجا بؤيوک اهميت کسب ائدير. خاطيرلاماق لازيم ديرکي،آذربايجانين تاريخي تورپاقلاري معين فتنه لره هرزامان معروض قاليب و بيز بوگون ده بو پلانلاشميش فتنه لرين جانلي شاهدييق. بوحساس شرايطده بيز آذربايجانليلارين سئچيملرده ايشتراکي ضروري خاراکتر داشيير.
آذربايجان ميللي جبهه سي
|
