|
منوچهر عزيزی (هارای) ايراندا راديکاليزم سونا چاتماقدادير ايرانلا غربين کئشمه کئشلی آغير تضييقلری داواميندا هاشمی رفسنجانی نين داهيلر (خبرگان) مجلسينين باشچيليغينا سئچيلمه سی ايله، ايران حاکميتی نين راديکال سياستی نين سونا چاتماسی احتمالی کيمی تصور ائتمک، هئچده غير نورمال دئييلدير. آمئريکا وطنداشلاری اولان ايرانلی ژورناليستلرين گويا جاسوسلوق اتهامی ايله حبس اولونانلارين درحال بوراخيلماسی، ايرانين آتوم تهلوکه سينين درحال کؤلگه يه بوراخيلماسی، عيراقدا آغير توققوشمالارين نسبی حالدا ساکيت لشمه سی، يوخاريداکی نظريه نين دوزگون اولماسينين ثبوتی کيمی ده گرلنديرمک اولار. بئله بير مهم سياسی دونوش نقطه لرين حياتا کئچمه سی ايله، رژيمين حاکميت سويه سينده قيسا بير پروسس کيمی تصور ائتمک چتين دير و هاشمی رفسنجانی نين سياسی حياتی گؤسته رير کی او، حاکميتين بوتون کئچيدلرينی آشاراق، قدرتين ان سون زيروه سينه يوکسلمک مقصدينی گؤدور. اونسوزدا اصلاحات و راديکال مرحله لريندن سونرا، اورتاق سياستين حياتا کئچمه سی اوچون هاشمی رفسنجانی دن باشقا رژيمين سياسی شاهمات صحنه سينده اؤنملی مؤهره سی قالماميشدير. آمئريکانين ايراندا ايره لی لميش بئله بير سياسی افلاسلا راضی لاشماسی، اونون اورتا شرقده تؤرنميش تهلوکه لی وضعيتدن ياخا قورتارماسينا، ايراندا نسبی صورتده راديکال حرکاتين آزالماسينا، عموميتله دونيادا تروريزمين قارشيسی نين آلينماسينا يارديم ائده بيلر. آمما سياسی صحنه ده دفعه لرله ميللت طرفيندن رد ائديلميش هاشمی رفسنجانی، رهبرليک خولياسيندا نه اينکی درين ريسکه شوبهه ايله ياناشماليدير، بلکه مصباح يزدی، جنتی و اونلار فوندا منتال آيت الله لاری، سپاه، بسيج و شهيدلر و محاربه افليجلری عائله سينی هله ده آنتی آمئريکا و اسرائيل سياستی آدی آلتيندا، اونون رهبرليک سويه سينه يوکسلمه سی نين چوخ جيدی مانع کيمی قابارمالارينی حيس ائتمه ليدير. داها دوغروسو آنتی آمئريکا و آنتی اسرائيل شوعارلاری ايله بوگونه دک دوام ائدن اسلام حاکميتی، 190 درجه لی دؤنوشله قيسا بير مرحله ده هاشمی رفسنجانی نين سياسی مقصدلری ايله راضيلاشماياجاقدير. باشقا تقديرده اونو مخملی يا نارينجی بير کودتا کيمی قيمتلنديرمک هئچده يانليش اولمازدی. لاکين ايران نه اوکراينادير و نه ده گورجوستان. چونکی ايرانين سياسی تاريخينين کولتور و مدنيتی بام باشقادير، يعنی ايرانين سياسی تاريخينده هئچ بير زامان دموکراسيايا دوغرو کئچيد دورانی ايره لی گلمه ميشدير. ايراندا ياشايان ميللتلر هله ده اوزون ايللر بويوندان بری شاهليق اصول اداره سينين شوونيتسی حرکاتيندان توتموش، ايران اسلام رژيمينين ارتجاعی داورانيشلاری نين آغير تحقيرلرينه معروض قالماسی، ايقتصادی، ايجتماعی، سياسی و کولتوره ل وضعيتين برباد وضعيته دوشمه سی، آغير ايشکنجه لر، اعداملار و آناياسادا ميللته حصر اولونان حقوقلارين دوندورولماسی و مينلر موجود پروبلملر، غربين ياشيل چراغيلا هاشمی رفسنجانی نين سياسی رهبرليک وظيفه سينه يوکسلمه سی، ميللتين راضيليغينا اينام يارادا بيلمه يه جکدير. اگر غرب اورتا شرقده اؤز منافعينی گودمک مقصديله بئله بير تشبوثلره معروض قاليرسا، مومکوندور کی، قيسا زامان اوچون قناعت بخش اولسون. لاکين استعمار آلتيندا ياشايان ميللتلر، هر هانسی بير قدرتين ايراده سيله، اؤزونون سياسی- ايجتماعی پلانلاری نين قورولماسينا راضيلاشماياجاقدير. چونکی 1385- جی ايلده آذربايجان ميللتی نين خورداد قيامی بيرداها ايراندا ياشايان ميللتلره و دونيا قدرتلرينه، هابئله موجود رژيمه اثبات ائتدی کی بو ميللت جيدی صورتده قدرتلی دموکراتيک اداره چی ليگينه ماليکدير.
ايسوچ- مالمو
|
