آذربايجان ميللي جبهه سي نين تکليفي اساسنامه سي (AMC)
پ د ف فورماتيندا
ورد فورماتيندا

يوردوموز آذربايجان دونيانين ان گؤزل و زنگين قديم اؤلکه لريندن بيري دير. بونا گؤره ده قديم چاغلاردان بؤيوک پارلاق مدنيت اوجاغي تانينميشدير. قوزئي آذربايجان مستقيل اؤلکه کيمي بوتون ساحه لرده انکشاف ائتسه ده، آنجاق آذربايجان ميللتي نين چوخلوغون تشکيل ائدن جنوبي آذربايجانليلار، بوگون ايرانين سياسي خريطه سينده يئرلشيب لر و بو اؤلکه ده ياشايان اهالي نين ياريسيندان چوخونو تشکيل ائدن باشي بلالي آذربايجان ميللتي نين قيزيل چيخان تورپاقلاري، ايستر تاريخي، مدنيتي، ايسترسه ده ديلي اؤزلليکله بو سون عصيرده يادلارين آياقلاري آلتينا آتيليب دير. بو اونو بير داها ثبوت ائديرکي، سيستماتيک ضدانساني متودلارلا ياشاديغيميز چاغداش عصيرده بو ميللتين اولو  وارليغي آسيميله سياست ايله يوخا چيخير!!

فلاکت لره سون قويماق اوچون آذربايجان ميللي جبهه سي وطنداشلاريميزين ميللي طلب لريني حياتا کئچيريلمه سي يولوندا چئشيتلي ايجتماعي، سياسي شخصلردن وگروپلاردان عبارت آشاغيداکي مسئله لرده مشترک فيکيرلر اؤزرينده ياراندي.

۱-نجي ماده: آذربايجان ميللي جبهه سي نين راي، فيکير و پروگرامي ۱۲ماده دن عبارت ۲۰۰۳-نجي ايل مارت آيي نين ۲۱ ده  ياييلان مراجعت ده قيد اولوندوغو کيمي آشاغيدا گؤستريلير:

۱) بين الخالق الچولره داياناراق تاريخي تورپاقلاريميزدا ياشايان هربير انسانين ميللي حقوقلارينين قورونماسي، هربير وطنداشين سئچيم حاقي نين تانينماسي، ميللي قورولوشلاريميزين (پارلمنت، اجرا حاکميتي ومحکمه لر) يارانماسي.
۲) انسان حاقلارينين برپاسي.
۳) آذربايجان خالقينين مستقيل بيرميللت کيمي اؤز ديل، ادبيات، تاريخ و مدنيتي نين قورويوب ساخلانماسي، آزادليغي يولوندا ايقتصادي، ايجتماعي وسياسي ساحه لرين گئنيشلنديريلمه سي.

۲-نجي ماده:-آذربايجان ميللي جبهه سي نين عضولري، ديگر ميللي اورگان و پارتيلالار آشاغيداکي شرطلرله فعاليت گؤسترمه ليدير:

۱) سياستده اعتماد قازانماق اوچون ميللي داياقلارا سؤيکنمه لي، يادلارا باغليليقدان اوزاق اولمالي.
۲) دموکراتيک پرنسيپلره اساسلانيب باشقالاري نين فيکير، راي، تکليف و سياستلرينه حورمتله ياناشمالي.
۳) آذربايجان ميللي جبهه سي نين مقصدينه نايل اولماسي اوچون ان عمده مسئله کيمي ميللي حرکته اينانمالي.

۳-نجي ماده:اورگانلار
 آذربايجان ميللي جبهه سي نين اورگانلاري:

۱) قورولتاي
۲) آذربايجان ميللي جبهه سي نين شوراسي
۳) اجرا هئيتي
۴) مرکزيت (دبيرخانا ) وتشکيلات اورگانلاري
۵) خزانه دار (مالييه)
۶) ايتيم (تعليم) وپروگرام
۷) تبليغات وتشويقات ( روابط عمومي)
۸) تست وآراشديرما
۹) احتياج اولورسا اورگانلارين ساييني آرتيرماق

۴-نجي ماده:قورولتای
قورولتای سياسي اورگان و پارتيالاردان سئچيلن لر تمثيلچي لردن عبارتدير. ۳ ايلده بير دفعه قورولتاي کئچيريلمه ليدير:

بيرينجي قيد:جنوبي آذربايجاندا، اؤلکه خاريجينده، عموميتله دونيانين بير چوخ جغرافي بؤلگه لرينده اورگانيزه شکلينده فعاليت گؤسترن سياسي پارتيالار، صنفي گروپلار و ديگر ايجتماعي توپلوملار اؤز تمثيلچي لريني قورولتايا گؤندرمه ليدير.

ايکينجي قيد:عضولرين قورولتايدا ايشتراکلاري سئچيم پرنسيپ لريندن آسيلي دير و بو ساحه ده شورا طرفيندن معين آئين نامه حاضيرلانماليدير.

اؤچونجو قيد:بيرينجي قورولتاي تشکيل اولونانا قدر تاسيسچيلر هئيتي، شورانين و اجرا هئيتي نين وظيفه لريني داشيرماليديرلار و اويغون زامان و مکان ايچرسينده ميللي جبهه نين ساغليم گؤجونه داياناراق، نهايت دموکراتيک قورولتاين راي ايله وظيفه سيني باشقا وطنداشلارينا دؤور ائده جک.

۵-نجي ماده:آذربايجان ميللي جبهه نين شوراسي :

عموميتله جبهه نين شوراسي ۹ نفراصلي عضو ۵ نفر اللبدل عضو و ۳ نفر مفتيش ده ن عبارتدير کي قورولتاي طرفيندن گيزلي راي ايله سئچيليب و نوبتي قورولتاياده ک وظيفه داشيرماليديرلار.

قيد- اللبدل لر اوچون ۹ نفر اصلي عضوده ن سونرا قالانلار ۵ نفره ده ک آرتيق رايي اولانلار ترتيب ايله سئچيله جک لر. عکس تقديرده اللبدل لر اوچون يئني ده ن راي آليناجاق.

ميللي شورانين وظيفه لري:

۱) قورولتايين سئچديگي استراتژي يه نظارت ائتمک.
۲) اجرائي هئيتين تکليفلرينه قرار وئرمک.
۳) صنفي و سياسي جمعيتلرين و پارتيالارين عضو اولماسيله باغلي قرار وئرمک.
۴) شورانين و باشقا  اورگانلارين راي وتکليف لرينه قرار وئرمک.
۵) تست وآراشديرما کميسيياسيني يارادماق.
۶) شورانين عادي اجلاسي آيدا بير دفعه کئچيريلمه لي دير و اجرائي هئيتين بو اجلاسلاردا اشتراکي اؤنملي دير.

۶-نجي ماده:اجرا هئيتي:
بو اورگان قورولتاي طرفيندن سئچيلير و نوبتي قورولتايا ده ک اؤز فعاليتيني دوام ائتمه ليدير.

اجرا هئيتين وظيفه لري:
اجرا هئيتي بير باشا آذربايجان ميللي جبهه سي نين قانونو تمثيلچي سي دير و اونون وظيفه لري آشاغيدا قيد اولونور:

۱) قورولتايين قرارينا اساسلاناراق مبارزه، استراتژي و تاکتيک لر يولون سئچمه سي
۲) اورگان و تشکيلاتلاردا فعالليق گؤسترنلر آراسيندا وظيفه بؤلگوسونون آپاريلماسي
۳) بوتون مالييه خرجلري نين بودجه يه گؤره ايرلي آپاريلماسي وايلک بودجه پروگرامينين شورايا تقديم ائديلمه سي
۴) اجرا هئيتي نين واونون تشکيلات اورگانلاري نين اجرا پرنسيپلري نين حياتا کئچيريلمه سينه مسئولاشديرماق
۵) ميللي شورانين قراريندان سونرا موجود پلاتفورما ايچرسينده آيري- آيري شخصلرله، سياسي گروپلارلا، ها بئله ايجتيماعي تشکيلات و اورگانلارلا امکداشليغين آپاريلماسي
۶) بوتون دانيشيقلارين، قرارلارين و خرجلرين پروتوکولون حاضيرلاييب، منتظم شکيلده ساخلانماسي
۷) ايلليک راپورتون شورايا تقديم ائديلمه سي عمده مسئله کيمي قورولتاين قارشيسيندا مسئوليتين داشينماسي
۸) اجرا ائديله جک فرمانلارين تشکيلات و اورگانلارا گؤندريلديکدن سونرا نظارتين ائديلمه سي
۹) وظيفه داشييان اورگانلار اجرا هئيتي نين نظارتي آلتيندا اولمالي

الف) تشکيلات:
عضولر قبول ائتمک، اورگانلار تشکيل ائديلديکدن سونرا بو اورگانلار آراسيندا علاقه لرين و ماراقلارين ياراديلماسي
ب) تعليمات:
بو اورگانين وظيفه سي جبهه نين سياسي و ايجتماعي ساحه لرينده،  عين زاماندا گؤنده ليک مسئله لر و جبهه نين مبارزه يولو ايله باغلي بيلگي وئرمک دير
پ) رابطه و نشريات:
بو اورگانين وظيفه سي جبهه نين هم داخلينده و همده خاريجينده آذربايجانليلارلا وهمچنين دونيا آذربايجانليلاري ايله علاقه ياراتماقدير
بيان نامه لر، قزه ته لر و ديگر نشريات لار اجرا هئيتي طرفيندن حاضيرلانييب ياييلماليدير. مصاحبه لر، کنفرانسلاري حاضيرلاماق و چئشيتلي وسائط ايله جبهه نين سياسي فيکيرلرين و پروگراملارين يايماق
ت) مالييه:
بو اورگان نين وظيفه سي بودجه ني حاضيرلاماق ومعين قايناقلاردان مالييه يارديمي آلماقدان عبارتدير
س) مرکزيت (دبيرخانا):
واحدلر آراسيندا علاقه ياراتماق واجرا هئيتين قرار و نظرلريني ديگر اورگانلارا چاتديرماق و سندلري ساخلاماقدان عبارتدير

۷- نجي ماده: تحقيقات:
بو اورگانين مسئولو (سوروملوسو) ميللي شورا طرفيندن سئچيلير و وظيفه لري آشاغيدا عبارتدير:

۱) اجرا پروگراملارين تشکيلي و اونون سرانجام راپورتلاري نين شورايا تقديم ائديلمه سي
۲) اورگانلارا نامزد اولانلارين صلاحيت وئرديکدن سونرا راپورتلاري اجرا هئيتينه تقديم ائدمک
۳) شخصلرين صلاحيت لرين معين مرحله لرده حاضيرلاماق
۴) شخصلرين و جبهه نين ايشلري حققينده تنقيد، شکايتلرين نتيجه لري حاققيندا راپورتلاري مسئوليت داشييانلارا تقديم ائتمک
۵) بوتون وظيفه لر و صلاحييتلر حققينده تحقيقاتلا باغلي پرنسيپ پروگرامي حاضيرلاييب، قرار چيخاريلماسي اوچون شورايا تقديم ائتمک
۶) ثمره لي سندلر و مدرک لرين منبعين تانيماق، داخلده وخارجده اولان گروپلارا شاميل اولان سندلري (مطبوعات، نشريات) توپلاييب و فايدالانماق.

۸- نجي ماده: عضولوک، اونون شرطلري وحقوقلاري:
۱) رسمي عضولر ميللي جبهه نين تشکيلات اورگاني طرفيندن عضو اولانلاردير. عضولر آشاغيدا گؤستريلن شرطلري رعايت ائتمه لي دير:

الف) ميلييتي آذربايجانلي و 18 ياشيندان يوخاري اولمالي
ب) ميللي جبهه نين اساسنامه سيني قبول ائتمک
پ) کنار تشکيلات و پارتيالارا عضو اولمامالي
ت) کرمينال ايشلردن اوزاق اولمالي وجبهه نين پرنسيپلرين رعايت ائتملي
س) عضولوک حاقلاري واختيندا اؤده لينمه لي. عضولوگه قبولدان سونرا همن شخصه تشکيلات طرفيندن عضولوک کارتيني تقديم ائتمه لي
ج) عضو اساسنامه اؤزرينده داورانيشماسا آشاغيداکي کيمي جزالاناجاقدير:

شفاهي اخطار- کتبي اخطار- وظيفه ده ن چيخارماق- عضؤلوک ده ن بير ايل کنارا (معلق) ساخلاماق وعضو حقوقلاريندان محروم ائتمک- عضولوگون لغو ائتمک.

۲) گروپلار:
گروپلار اوچ جور اولاراق رسمي عضولردن، باغليلاردان و حمايه دارلاردان عبارتدير.

۳) رسمي عضولر:
سياسي، ايجتيماعي وايقتيصادي پروگراملارين حاضيرلاماسيندا اؤز فيکير و راي لريني سؤيله ين و ديگر عضولرين تکليفلرينه قرار وئره بيلر.

۴) باغليلار:
ايجتيماعي، سياسي و ديگر مباحثه لي مسئله لرده فيکير آيريليغي اولورسادا،  جبهه نين عمومي استراتژي سيني ايرلي آپاريلماسيندا گؤسترمه ليدير.

۵) حمايه دارلار:
اؤز نظر و ديققت لريني يوروتمه ده ن ميللي جبهه نين پروگراملاريني حمايت ائديرلر. بوگروپلار جبهه نين کئچيرديگي ايجلاسلاردا و چيخان قرارلاردا ايشتراک ائتمک حقوقلارينا مالک دگيل لر.

۹-نجي ماده: دونيانين چئشيتلي يئرلرينده ميللي جبهه نماينده ليکلري نين تشکيلي (اجرا هئيتي، شهر کميته سي، شورادان عبارتدير)

۱) اؤز عضولريندن چئشيتلي يئرلرده موقتي اجرا هئيتي نين ياراديلماسي. بو اورگان ميللي جبهه نين اساسنامه سي اؤزرينده گؤندليک ايشلري نين مسئولو اولاجاق.

۲) شورالار:
موقتي اجرا هئيتي گئنيش علمي فيکيرلري اولان صلاحيتلي شخصلري توپلاماقدان عبارتدير. شورا اجرا هئيتي ايله مسئله لري مشورت ائتديکدن سونرا اؤز نظريني سويله يه بيلر. شورانين ترکيبي ميللي جبهه نين بؤلگه ده موجود اولان عضولري نين ساييندان آسيلي دير و اونلارين سايي 10 نفرده ن آرتيق اولماسي هئيتين قراريندان آسيلي دير. شورانين اختياري و نظامي، جبهه مرکزيندن اعلان اولونماليدير.

۳) عضو اولماق شرطلري:
عضو اولماق اجرا هئيتي نين و يا بؤلگه ده کي کميته نين اختياريندا اولان، آشاغيداکي شرطلره سؤيکنمه ليدير:
الف) کونوللولر عريضه يازماقلا ماراق گؤسترير
ب) کونوللولره ۲ نفر رسمي عضولرين تصديقي گرکدير
پ) تشکيلات اورگاني ۸-نجي ماده ني نظرده توتاراق يئني عضو حاققيندا بيلگي توپلاديقدان سونرا قرار وئرمه لي دير. گرک اولورسا يئرلي اجرا هئيتين ديگر عضولرين نظرين ائشيدديکدن سونرا، بو عضولرين صلاحيتي حاققيندا فيکير سؤيله يه بيلر
ت) معين مرحله لردن سونرا يئني تشکيلات اورگاني طرفيندن عريضه لرمرکزي شورايا گؤندريلير و همين شخصلره عضولوک کارتلاري تقديم اولوندوقدان سونرا اجلاسلاردا ايشتراک ائتمک اوچون صلاحيت وئريلير

۴) مالييه:
بوتون مالييه مسئله لري مرکزي اورگانين اساسنامه سي اؤزرينده حياتا کئچيريلديکدن سونرا، سندلر مرکزي شورايا گؤندريلمه ليدير. بوتون گلير گتيرن منبعلر (کانستلر، سرگيلر و سايره...) مرکزي شورانين اجازه- سي ايله حياتا کئچيريلير.

۵) رابطه و نشريات:
ميللي جبهه نين ماراقلاريني احاطه ائتمک اوچون علاقه لرين بوتون بؤلگه لرده رابطه، نشريات، راديو و ساير... اورگانلار ميللي جبهه نين استراتژي چرچيوه سينده اجرا هئيتي نين ترکيبينده فعاليت گؤسترمه ليدير. يئرلي اهالي نين ديلينده مصاحبه لرين، وئريليشلرين کئچيريلمه سي يالنيز اجرا هئيتي نين قراريندان سونرا حياتا کئچه بيلر.

محلي کنفرانسلار:
ميللي جبهه نين محلي کنفرانسلاري ايلده بير دفعه تشکيل اولور، همبسته گروپلارداندا بير نفر رسمي مکتوب ايله تانينيب و ايشتيراک ائده بيلر.

۶) سئچکيلر:
اگر يئرلي عضولرين سايي ۵۰ نفردن آز اولارسا  بؤتؤلوکله ايشتراک ائده بيلر. ساييلار ۵۰ نفري کئچيرسه او زامان هر ۱۰نفر اؤز آراسيندا بيرنفري سئچيب نماينده کيمي گؤندره بيلر.

۷) يئرلي کنفرانسين وظيفه لري:
شورا و اجرا هئيتي نين راپورتونو  دينله مک. ميللي جبهه نين آماجلاريني حياتا کئچيرمک اوچون ساغلام فيکير سويله مکله يئني اجرا هئيتي نين و يا شورانين سئچيلمه سي.

۸) کنفرانسين فوق العاده کئچيريلمه سي:
اگر يئرلي اجرا هئيتي اؤز وظيفه سينين عهده سيندن گلمه سه و يا استعفا ائدرسه، هابئله ميللي جبهه نين استراتژي سي نين دؤزگون استقامته يؤنتمه سه، بئله تقديرده يئرلي شورا ميللي جبهه نين مرکزينه خبردارليق ائتملي و پرنسيپلر چرچيوه سينده يئني اجرا هئيتي سئچيلمه ليدير. يئني اجرا هئيتي سئچيله نه  قدر مرکزيت طرفيندن بير نئچه نفر صلاحيتلي شخصلره يئرلي اجرا هئيتي نين فعاليتيني دوام ائتديرمک اوچون موقتي حقوق وئريلير.

۱۰-نجي ماده: مسئوليت ده ن چکيلمک:
مسئول عضولرين هر بيري آشاغيدا گؤستريلن مسئله لره گؤره اؤز صلاحيت لريندن اوزاقلاشديريلير
۱) استعفا ائدمک و بو استعفا اجرا هئيتي طرفيندن تصديق اولونماسي
۲) اگر مسئول عضو مسافرته گئدرکن يئرلي اجرا هئيتينه بير آي اؤنجه خبروئرمه سه
۳) اگر آرديجيل اولاراق اؤچ دفعه اجلاسلاردا ايشتراک اتمزسه

۱۱- نجي ماده:
بو اساسنامه ۱۱ ماده دن  عبارت اولاراق آذربايجان ميللي جبهه سي نين  مؤسس هئيتي نين ۲/۵/۲۰۰۳ تاريخينده اجلاسيندا تصويب اولونوب.

ايضاح: بو اساسنامه اورژينال ايله مقايسه و عيني دير. باشقا نسخه بو نسخه ايله فرقلي اولارسا  اعتبارسيز ساييلاجاق.

آذربايجان ميللي جبهه سي نين فرماني(AMC) 

الف- گيريش:
آذربايجان ميللي جبهه سي  (  AMC) فعاليتينده مقصد جنوبي آذربايجاني، هابئله ايرانين باشقا بؤلگه- لرينده ياشايان آذربايجانليلاري آسيميلاسيا دوروموندان قوروماق دير. بونون اوچون عمده مسئله وطنداشلارين ميللي حقوقو قورونمالي و اونلارين هر بيري نين سئچيم حاققي تانينمالي دير. ميللي قورولوشلار، او جمله ده ن( پارلمنت، اجرا حاکميتي و محکمه لر) برپا ائديلمه ليدير!!

ب- سياسي پروگرام:
آذربايجان ميللتي نين  پارلاق تاريخي و گئچميش تجربه لري بيزيم بو پروگرامين اساس تملين تشكيل ائدير و بيز بو جنبه لرين ان ياخشي سين،  وطنپرورليك،  آزادليق،  ترقيخواهليق و عدالت پرورليك ده ن سياسي فكيريميزي يارادميشيق.

وطنپرورليك: آذربايجاني و اونون ميللتين سئومك دئمك دير. بو اؤز ميللي كيمليکيميزه فخر ائديب و قورويوروق ، عموميتله ميللتميزين حق وحقوقوندان مدافعه ائتمكده ان كسرلي سلاح ساييلير.

آزادليق: بوتون ساحه لرده  انسانين انكشافي  اوچون يارديمجي دير و بونا گؤره هر وطنداشين حقوقون قوروماق اوچون سياسي تفكورون باشيندا دورماليدير.

ترقيخواهليق:  هرطرفلي اقتصادي، سياسي و فرهنگي توسعه و انكشاف اوچون ميللي تعهد ساييلر و بير ميللتي گئري قالماقدان نجات وئره ر و گله جكده انكشاف قاپيلارين آچماقدا و اؤلكه نين آبادلاشماسيندا و وطنداشلارين بيلگي و رفاه لاري اؤزرينده اؤنملي دير.

عدالت پرورليك: بو دئمك ديركي انسانلاردا استعدادي چيچكلنديرير، برابر اولماماقلاري تعديل ائدر انسانلارين گله جگين تامين ائتمكله انكشاف قاپيلارين اونلارين اؤزونه آچماقدا بؤيوك رول اوينار.

يوخاريدا قيد اولونان ارزشلر اؤزرينده آشاغيداكي پرنسيبلر سياسي پروگراميميز عنوانيله اعلان اولونور:

۱) گؤنئي آذربايجانين تورپاق بؤتولوگو تاريخي سرحدلرينين ايچرسينده، ميللي دؤلتيميزين قورولوشو و ميللي وارليغيميزدان مدافعه ائتمك .
۲) بيرلشميش ميللتلرين قانونلاري اؤزرينده جنوبي آذربايجانليلار آزاد سئچگيلرله اؤز طالع لرين اؤزلري سئچمگه آزادديرلار.
۳) جنوبي  آذربايجانليلارين  مقدراتلاري  يالنيز اؤز اراده لري ايله الده ائديلمه ليدير. باشقالاري اونلارا تصميم توتماق حاقلاري يوخدور. بو او حقوق دئمكديركي بيرلشميش ميللتلرين بشر حقوقلاري قانونلاريندا و سياسي حقوق، مدني، اقتصادي، ايجتيماعي و فرهنگي آنلاشمالاريندا توصيف اولونموشدور و اونا شامل ديركي بوتون جان و مال قانون  پناهيندا قوروماق دؤلتين وظيفه لريندندير و همچنين حداقل حيات شرايطي انساني حقوقلاريني نظرده آلاراق عموم خالقا تامين اولماليدير.
۴) بوتون وطنداشلار قانون قارشسيندا برابر حقوقا مالك ديرلر و هئچ قومي، ديني، جنسي يا طبقاتي اؤستونلوك اولماماليدير.
۵) سياسي پارتيالار و ايشچي، صنفي توپلوملار هرعقيده ده اولورسا اولسون آزادديرلار. قانون اونلارين حقوقلارين قوروماقدا حاكم دير. بوتون مطبوعات، نشريات، راديو و تلويزيون آزاد اولماليديرلار واونلار اوچون معين قانونلار تدوين اولماليدير.
۶) آذربايجان توركجه سي ميللي و رسمي ديل اولاجاق و آذربايجاندا ياشايان ائتنيك گروپلارين آزليغينا باخماياراق آناديلي، تاريخ و مدنيتلرينين انكشافي اوچون امكانلار ياراناجاق.
۷) محكمه كادرلاري مذهبي و سياسي تشكيلاتلاردان آسيلي اولمادان مستقيل فيكيرلي اولماليديرلار.
۸) كند تصرفاتي (( اكينچيليك)) و كندلرده صنعت و خدماتي آرتيرماقلا ضمانت اولونا كي بوتون ايستحصال انكشاف ائده و بوساحه ده آرتيق اعتبار و يايين شبكه لري و يوللار اوچون آدديملار گؤتوروله.
۹) سياسي، ايجتيماعي و بوتون ساحه لرده جنسيت (خانيم- آقا) اوستونلوگو اولمادان هامي  برابر حقوقا  مالك اولماليدير. عايله لرده خانيم و آقا نين برابر حقوقا مالك اولماسي ،عايله نين محكم و صميمي اولماسيندا و اوشاقلارين دؤزگون تربيتينده آرتيق رولو اولار. همچنين دؤلت آرتيق امكانات يارادماقلا اوشاقلاري ساخلاماقا و تربيت ائتمكده و خانيملارين جامعه ده فعال اولماقلاريندا يوكسك رولو اولاجاقدير.
۱۰) اوزون ايللردير آذربايجان سينما و تياتري و سايره علمي و هنري ساحه لرينده ضربه لره معروض قالميش و بو اهميتلي ايشلرده بوتون ديرلي هنرمندلر  و متخصصلرين چاليشمالاري ضروري اولاجاق. هابئله خلاق قووه لر اوچون امكانات يارانماليدير.
۱۱) آرتيق اؤستونلوك  معارف اوچون خصوصي ايله آنا ديلي نبن انكشافي اوغروندا وئريلمه ليدير.
۱۲) اقتصاد، تجارت و صنعت و. . .اطراف محيطين تميزليگيني قوروماقلا انكشاف ائتمه ليدير. بوتون  سو، تورپاق، اورمان (مئشه لر) و شهرلرين هاواسي نين تميز ساخلانمالي و آرادان گئدمكدن قورونماليدير.
۱۳) ميللي گليرلرين و خدماتين عادلانه بؤلونمه سي و طبقاتي فاصله لري شهرلر و كندلر آراسيندا آزادماق ايشسيز، نقص عضو اولانلار، امكلي، خسته لر، سرپرستسيز عايله و اوشاقلاردان حمايت ائتمك و عموميتله رفاه و ياشاييش سويه سين قالديرير ميللي تدبيرلر ايچرسينده ضروري دير.
۱۴) شهر، كند و يوللارين معاصرشكيلده آبادلاشماسي و يوخسوللارا مسكن تيكيلمه محض آبادانليق پروگراملارينين ايچينده اولماليدير.
۱۵) آذربايجانليلاركي ايران-عراق ساواشيندا و يا باشقا حادثه لرده جان و مال زيانلارينا معروض قالميشلار، معين قايناقلاردان اونلارين حياتلاري ياخشيلاشماسي اوچون حمايت اولونماليديرلار.