|
قهرمان بابکين يولونا داوام وئره ن آذربايجانين غيرتلي ميللتي! آذربايجانين تاريخي اولو قهرماني بابک خرم دين، ايگيرمي ياشيندان باشلاياراق ايگيرمي ايکي ايل يوردوموزو عباسيلر کيمي اشغالچي خليفه لرين تجاوزوندان قوروياندان سونرا، ائرمني سهل ابن سمباطين دسيسه لري ايله توتولاراق ۲۲۲هجري قمري ده عراقين سامرا شهرينده خليفه المعتصمين سارايندا آغير اشکنجه لردن سونرا، قهرمانجا سينا جانيني خالقينين و وطنينين اوغروندا قوربان ائتدي. اونون دوغوم تاريخي دقيق بللي اولماسادا يئدي ايلدن بري عنعنوي اولاراق اونون دوغوم گونو هر ايل تير آيي نين ايکينجي جمعه آخشامي و جمعه گونلري، يوز مينلر آذربايجانلي ايگيدلرين ايشتراکي ايله محتشم و طنطنه لي صورتده قئيد اولونموشدورکي، بو ايلين محتشم مراسيم گونلري تير آيي نين ۱۱و ۱۲–نجي گونلرينه دوشه ره ک يوز مينلر آذربايجانلي ايگيد بابک قالاسينا توپلاشاجاقلار. لاکين هرايل کي کيمي خالق آرا پوزقونلوق مقصديله بو محتشم گونلري باشقا گونلره سالماق ايسته ين کيمسه لر، بو ايل ده حضرت فاطمه زهرا (س) نين بير روايت له غيررسمي وفات گونونو بهانه ائده ره ک بو محتشم مراسيمي بيرهفته گئجيکديرمک قرارينا گلميشلر. حال بو کي، ۱۳۸۳-نجو ايل تقويمي ايله او حضرتين وفات گونو قيرميزي خط ايله يازيلميش چاهار شنبه گونو تيرآيي نين ۳۱ ري قئيد اولونموشدور. عادتا ايران تقويم لرينده قيرميزي خط ايله قئيد اولونان گونلر و رسمي تعطيللر ، قارا خط ايله قئيد اولونموش روايته گؤره محکم اعتباره مالک دير.
هرايل تيرآيي نين ايکينجي جمعه آخشامي وجمعه گونلري عنعنوي اولاراق قهرمان
بابکين دوغوم گونونو يالنيرخالقيميزين بؤيوک ميللي بايرامي کيمي قئيد
ائده ره ک ، خالقيميزين ميللي و مدني حاقلاري- نين اودنيلمه سي اوغروندا
فريادلي محتشم چيخيشلار و اعتراضلار ائديله ره ک و هر ايل کي، کيمي تفرقه
سالانلارين واوندان فايدالانلارين نادانجاسينا مقصدلري پوچا چيخاجاقدير!
|
