آذربايجان ميللی جبهه سی نين نوروز بايرامي مناسبتيله تبريکی

عزيز هموطنلر!

ميللتيميزين ان عزيز و قديم بايرامی اولان نوروزون گليشی عرفه سينده ييک. نوروز  آيدينليق دير، دورولوقدور، يئنی احوال و روحيه دير. ايل، فصيل کروانی نين قدم لرينه سپيلن بير دولچا نوردور نوروز. هله چوخ قديم لردن اينسانلارا بوتون ايلين نئجه کئچه جه گينی نوروزون گليشی ايله علاقه لنديريرديلر.

 آذربايجان ميللي جبهه سی (AMC) بو عزيز گونده  ميللتيميزين سئوينجينه شريک اولور. بو عزيز گون مناسبتی ايله بوتون وطنداشلاريميزی اورکدن تبريک ائدير و يئنی ايلين ميللتيميزه  خئيرلی،  اوغورلو  اولماسينی آرزو ائدير.

بيلديگينيز کيمی، ايللرديرکی، خالقيميزين ايگيد و فداکار اولادلاری ميللی- مدنی حقوقلاری اوغروندا يورولمادان چاليشرلار. و بوگونه ده ک آغير ايتکی لره معروض قالاراق، هله ده نئچه- نئچه ژورناليست لريميز، ايجتماعی، علم و مدنيت خادم لری قارانليق زندانلاردادير. بو آجی حادثه لر هاميميزی کدرلنديرير. آنجاق ايراندا غيردموکراتيک قووه لرين تضيق و باسقلارينا باخماياراق، ميللی مبارزه، مدنی شکيلده دوام ائتمک ده دير.

AMC، امين ديرکی، او گون گله جک بوتون آذربايجان ميللتی باهار بايرامين گليشينی يوردوموزون اوجا داغلاری باشيندا «ده ده قورقود» تونقاللارينی يانديراراق، خالقيميزی تبريک ائده جک. بيرداها باهار بايرامينيزی، يئنی ايل ايله بيرگه مبارک اولسون دئييريک و شرفلی مبارزه ميزده هاميميزا اوغورلار اولسون!

آذربايجان ميللي جبهه سي
2011-03-18
ايسوچ- مالمو