|
21 آذر گونونده ميللی حکومتين قورولوشو و دوريلمه - سی مناسبتيله آذربايجان ميللی جبهه سی نين «بيلديريشی » عزيز آذربايجانلی وطنداشلار! تاريخی 21 آذر گونونون 64 - جی ايل دؤنومونون عرفه سينده ييک. 1324- جی گونش ايلی شهريور آينين 12 سينده آذربايجان خالقينين ميللی ايستکلری 12 ماده دن عبارت، آتلانتيک آنلاشماسی اساسيندا، 48 نفر وطنداشلاريميزين امضاسی ايله آذربايجاندا يايلدی. آذربايجان دموکرات فرقه سی نين بو مراجعتی خالق آراسيندا تقدير گؤردو و آز مدتده بوتون شهرلردن، کندلردن تلگرافلار و مکتوبلار سيل کيمی آخيب تبريز شهرينه گلدی. آبان آينين 29- 30 دا 150 مين امضاء ايله 800 نفرليک خالق کنگره سی تبريز شهرينده طنطنعه لی شکيلده برپا اولوندو. محض مبارزه نتيجه سينده 21 آذر گونو آذربايجانين ميللی مجلسی و ميللی حکومتی ياراندی. مبارزه نين اؤن سيرالاريندا گئدن خالقيميزين ميللی کادرلاريندان ساييلان حاج ميرزاعلی شبستری ميللی مجلسين صدرينه و ميرجعفر پيشه وری دؤولت باشچيليغينا سئچيلديلر. آذربايجان ميللی حکومتی دؤرونده خالقيميزين باش اوجاليغی و بو ديارين انکشافی اونودولماز بير فاکت دير. تاسف اولسون کی، بير ايلدن سونرا يعنی 1325- جی گونش ايلی 21 آذر گونو يئنی دن قارا بولودلار خالقيميزين باشی اوسته کوچدو. پهلوی حاکميتی نين اشغالچی اردوسو خارجی متفق لرين يارديمی ايله آذربايجان ميللی حکومتينی دويردی. ميللی حکومتين بير ايل ايچرسينده آذربايجانين مختلف کند و شهر لرينده ياراتديغی بوتون نائلييت لری تاريخدن سيلديلر. آذربايجانين تاريخينه، مدنيتينه، ديلينه و بوتون ديرلرينه قارشی وحشی جه سينه هجوم ائتديلر. آذربايجان ميللی جبهه سی، 21 آذر گونونده شهيداولان بوتون انسانلاريميزی درين حورمتله خاطيرلايير و اونلارينقالديرديقلاری ميللی بايراغين انمه يه جه يی اوغرونداسارسيلماز اراده ايله مبارزه آپاراجاغينی اصرارلا وورغولايير. نه يازيق کی تبريک و باش ساغليغی عين گونه تصادف ائتمکده دير. 1324- جی 21 آذر گونونده ميللتيميزین بويوک هيجان و ايش بيرليگی ايله قوردوغو ميللی حکومت مناسبتيله آذربايجان خالقينی تبريک ائديريک. 1325- جی ايل 21 آذر گونونده ميللتيميزين امگی و جدی چاليشماسی نتيجه سينده قورولان ميللی حکومتيميز دوريلميشدير. ميللتيميزين باشی ساغ اولسون. اينسانليق تاريخی بو شکيلده مغلوبيت لره و غلبه لره چوخ شاهد اولموشدور. لاکين ميللتلرين دويغولاريندا، دوشونجه لرينده بايراقلاشان ايده آل لار هئچ بير زامان مغلوب ائديلمه ميش، دويغولاردان، دوشونجه لردن سيلينمه ميشدير. 21 آذر ايده آلی ميللتيميزين دويغولاريندا و دوشونجه لرينده ابدی اولاراق ياشاياجاق دير. 1324- جی ايلين شانلی 21 آذر گونوندن بوراخيلان تاثيرلردن بير نئچه سين بئله قيد ائتمک اولار: 21 آذر، آذربايجان ميللتی نين ميللی حرکتی نين جانلی تاريخی دير! 21 آذر، آذربايجان تورکلری نين ميللی وارليغينا خور باخانلارا اتهام نامه دير! 21 آذر، ميللی شعورون جانلانماسيندا ، ميللی اسارته سون قويماقدا، ميللی آزادليغا چاتماقدا ان يوکسک رول اويناياجاقدير!
آذربايجان ميللی جبهه سی
( AMC)
|
