|
عزيز هموطنلر! قارا قيشين عؤمورو آرتيق سونا چاتيب. نوروز بايرامی و يئنی ايليميز آرتيق قاپيلاريميزی دؤيمکده دير. ميللتيميزين ان عزيز و قديم بايرامی اولان نوروز آيدينليق دير، دورولوقدور، يئنی احوال و روحيه دير. ايل، فصيل کاروانی نين قدم لرينه سپيلن بير دولچا نوردور، نوروز. هله چوخ قديم لردن اينسانلارا ايلين نئجه کئچه جه گينی نوروزون گليشی ايله علاقه لنديريرديلر. آذربايجان ميللي جبهه سی بو عزيز گونده خالقيميزين سئوينجينه شريک اولور و بو مناسبتله بوتون وطنداشلاريميزی اورکدن تبريک ائدير و يئني ايلين ميللتيميزه خئيرلی، اوغورلو اولماسينی آرزو ائدير. 30 ايل ديرکی ايران ايسلام رژيمينين غيردموکراتيک داورانيشلاری ايسلام نامنه دوام ائدير. تاسفله وطنداشلاريميزين ايقتصادی، ايجتماعی، سياسی و مدنی دورومو داها آشاغی سوييه يه انميشدير. حاکيميت طرفيندن خالقا گؤستريلن آغير ايشکنجه لر، اعداملار و باشقا بو کيمی غيراينسانی حرکت لر هله ده دوام ائتمک ده دير. ائله بونا گؤره ده حاکيميت، خالقين اينامينی هئچ واخت قازانا بيلمه يه جکدير. اگر ايران اسلام رژيمی اؤز خيرينی گودمک مقصديله مختليف سعی لر گؤستريرسه ، بو اونلارا آنجاق قيسا بير زامان اوچون کمک ائده بيلر. آمما هئچ واخت استيثمار آلتيندا ياشايان بير خالق، اؤز منفعت لرينی حياتا کئچيرمک و بو يولدا غيردموکراتيک اصوللارا ال آتان حاکيميته قارشی هر زامان باريشماز اولاجاقدير. 2006 – جی ايلين ماييندا آذربايجان خالقينين قيامی، ايراندا ياشايان ديگر خالقلارا و دونيا قدرتلرينه، هابئله موجود رژيمه بيرداها ثبوت ائتدی کی، آذربايجانليلار حقيقتا گوجلو دموکراتيک اداره چيليک باجاريغينا ماليکدير. AMC ، نئچه ايلديركي جنوبي آذربايجان خالقينين آجيناجاقلی دورومونو گؤرور و ايران حاکيميتی نين بو خالقا قارشی تؤرتديگی غيردموکراتيک حرکتلرينی دونيا ايجتماعيتی قارشيسيندا ايفشا ائدير. آرتيق بو يولدا مثبت آدديملار آتيلماقدادير. عموميتله سويداشلاريميزين آرزو و ايستكلرينی حياتا کئچيرمک آماجی بو گون بوتون دوشونجه و دويغولارين بيرلشمه سينه و ميللي آزادليق اوغروندا سفربرليگه گتيريب چيخارير. بو بيزيم مقصديميزدير. AMC ، امين ديرکی، او گون گله جک بوتون آذربايجان ميللتی باهار بايرامينين گليشينی يوردوموزون اوجا داغلاری باشيندا ده ده قورقود تونقاللارينی يانديراراق سويداشلاريميزی تبريک ائده جک. بيرداها باهار بايرامينيزی و يئنی ايلينيزی تبريک ائديريک و بو شرفلی مبارزه ميزده قوی هاميميزا اوغورلار اولسون!!
آذربايجان ميللي جبهه سي (
AMC
)
|
