|
بيلديريش 2006- جی ايل مای آينين 22- ده، گونئی آذربايجانليلارين ميللی و مدنی حرکاتين سسينی قانلا بوغماغا چاليشان ايران اسلام حاکميتی، بو ايلده اؤز چرکين عمل لريندن ال چکمه يه ره ک، اؤنجه دن تدارک گؤرموشلر. بئله کی، جاری ايل مای آيی نين 22 سيندن اؤنجه، آذربايجان ميللی حرکتين قارشسين آلماق مقصديله، آذربايجانين بير چوخ بؤلگه لرينده، حاکميت قووه لری نين يئرلشديريلمه سی و بونونلادا اؤز منفور پلانلارينی حياتا کئچيرمک جهدلری بونا باريز ثبوت دير. آذربايجان ميللی حرکاتين بيرچوخ فعاللاری بو عرفه ده حاکميت طرفيندن توتولاراق زندانلارا سالينيب و آغير اشکنجه لره معروض قاليب. آمما متين آذربايجان ميللتی نين ميللی فعاللاری بوتون چتينليک لره باخماياراق، بو چتين بير دؤورده صبر و تمکين ليک گؤسته ره ره ک جدی شکيلده بشر حقوقلارينا ضيد چيخان قانونلارا قارشی اؤز اعتراضلارينی بيلديرمکدن چکينميرلر و اؤز پرنسيپ لرينده سارسيلمازديرلار. آذربايجان ميللی جبهه سی، ايران حاکميتی نين بو آنتی دموکراتيک کيفيت لرينی محکوم ائده ره ک بيلديريرکی، ايران رژيمی بشرحقوقلارينا ضيد مناسبت گؤسترير. بوتون بونلارلا ياناشی حاکميت، آذربايجان تورکلری نين ميللی حقوقلارين اينکار ائتمکده و اونلاری آپارتايد سياستی ايله اريتمکده قرارلی دير. بئله ليکله آذربايجان ميللتينه قارشی تهديدلرين و تضييق لرين آرتماسينا شرايط يارادير. تاسفله قيد ائديلمه لی دير کی، حاکميتين بو چرکين سياستينی دستکله ينلر آراسيندا آذربايجان آدی داشايان مانقوتلاردا واردير. گؤره سن، آذربايجان تورپاغيندان، سويوندان، چؤرگيندن و بير چوخ زنگين امکانلاريندان فايدالانان و وظيفه نامينه، رتبه نامينه حاکميت دايره لری نين منفور پلانلارينا باش اگه ن و اونلارا بو يولدا قول اولان مانقورتلار گله جک ده يئنی آذربايجان نسلی نين قارشيسينا هانسی اوزله چيخاجاقلار؟ امينيک کی، بو سئواللار اؤز واختيندا جوابينی تاپاجاق. هله ليک ايسه بو قدر ... ايندی فارس ديللی مئديا ايشچيلری ايستر داخلده، ايسترسه ده خارجده آذربايجان حرکاتينی بايکوت ائتمه لری، اينسان حقوقلاری نين گويا مدافعه سينه تامينات گؤسترن بشرحقوقلاری اورگانلارين بو مسئله يه هئچ بير رياکسيا گؤسترمه مک لری اولدوقجا معمالی دير. آذربايجان ميللی جبهه سی! بير داها آذربايجان ميللتينه بو شرفلی يولدا دستک اولاراق، خالق حرکاتی نين يوخون گله جک ده آزادليق قاپيلارينی آچاجاغينا و ميليونلارلا سويداشلاريميزين سعادتی نين برپا اولماغينا اينانير. آذربايجان ميللی جبهه سی، 2006- جی ايلين 22- مای حادثه لری نين مثبت فاکتورلارينی ديرلنديره ره ک آشاغيداکیلاری قيد ائدير: - 22 مای، آذربايجان ميللی حرکاتينی چاغداش عصيرده آذربايجان تورکو آديله تانيتديردی! - 22 مای، آذربايجان ميللی حرکاتی گونئی آذربايجاندا مرکزلشديگينی ثبوت ائتدی! - 22 مای، آذربايجان ميللتی نين اؤزو- اؤز طالعينی حل ائتمه يه قادر اولدوغونو ثبوت ائتدی! - 22 مای، ايران آدلی سياسی اورگان و تشکيلات لاری کؤلگه ده قويدو! - 22 مای، آذربايجانليلارين ميللی وارليغينا خور باخانلاری اتهام ائتمه يی باجاردی! - 22 مای، آذربايجان ميللتی نين ميللی شعورونون داهادا سرعتلنمه سينده و بونونلادا اسارته سون قوياراق، قورتولوشا چاتماغا بير جيغير آچدی! آذربايجان ميللی جبهه سی، بيرلشميش ميللت لر و عموم دونيا اينسان حقوقلارينی قورويان تشکيلاتلاری ، آذربايجان ميللتی نين حقوقلاری نين تاپدالانماسنين قارشسينی آلماغا چاغيرير. و زندانلارا سالينميش سويداشلاريميزين، تئزليکله شرط سيز آزاد ائديلمه سينی طلب ائدير. آذربايجان ميللی جبهه سی 07-06-2007 مالمو- ايسوچ
|
