|
بيلديريش حورمتلی وطنداشلار! تاريخ حقيقتين جانلی شاهدی دير. بوگون، آذربايجان ميللی حکومتی نين ۶۰ ايلليک ايل دونومو عرفه سينده ييک. ۱۳۲۴- جی گونش ايلی نين ۲۱ آذر گونو آذربايجان خالقی، تهراندا يووا سالان مرکزی حاکميتين ميللی ظولمو قارشيسيندا آياغا قالخدی. و ميللتيميز، مبارزه نتيجه سينده، آذربايجان دموکرات فرقه سی نين قوجامان رهبری، ميرجعفر پيشه وری و اونون مسلک داشلاری نين رهبرليگی آلتيندا، محکم اراده ايله، ميللی اسارته سون قوياراق، اؤزو- اؤز مقدراتينا حاکم اولدو. بيز بو شانلی و شرفلی گون مناسبتيله بوتون وطنداشلاريميزی تبريک ائديريک!
بير ايل ايچرسينده، آذربايجاندا گئدن هر طرفلی ثمرلی اصلاحات و انکشافلار دوستلاری
سئوينديريب و دوشمنلری ناراحت ائديردی. ائله بونا گؤره ده مرکزی پهلوی حاکميتی،
گونو-گوندن آذربايجان ميللی حکومتين محو ائتمگه چاليشيردی. نهايت مرکزی حکومتين
مرتجعلری قاباقدان خاريجي مستبد دولتلرين حمايه سين الده ائتديکدن سونرا
۱۳۲۵-
نجی گونش ايلينين آذر آيی، آزاد سئچيملر بهانه سی ايله آذربايجانا قوشون حيصه لری
يئريديب و آذربايجانين جوان ميللی حکومتين قانلا بوغدو. بؤيوک آرزولارلا يانان
آزادليق مشعلی يئنی دن سوندو. قارا ترورلاردا، دار آغاجلاری آلتيندا، قارانليق
زندانلاردا، اشکنجه لرله مظلوم خالقيميزا ديوان دوتولدو. بو دهشتلی يوروشلرده
چئشيتلی قايناقلارين ورديکلری معلوماتا گؤره شهيدلرين سايی
۴۰
مين نفره قدر قيد اولموشدور. جنايتکارلار بيلمه لی دير کی، تاريخ بيرنسلين گؤز
ياشلارين، آه و فريادينی اونودماياجاقدير. عزيز هموطنلر! ۱۳۲۵-جی ايلين آذر آيی خصوصيله ۲۱ آذر گونو، آذربايجان ميللتی اوچون ميللی فاجعه دير. تاريخدن تجربه آلاراق، گله جکده بير داها بئله دهشتلی فاجعه لره مطلق يول وئريلمه مه لييک. تاسفله پهلويلرين ميراثی اولان ايرقيچيليق ايراندا بوگونده سرعتله دوام ائتمکده دير. آذربايجان ميللی جبهه سی نين، گونئی آذربايجانلا ايلگيلی، ميللی آماجلاريميز اوغروندا شفاف ومحکم آدديملار گؤتورمه سی سئويندريجی حال دير. بيزيم، سيزين گلن آيلاردا چاليشمالاريميزين آرتماسی ضروری خاراکتر داشايير. اينانيريق کی، ۲۱ آذر ميللی شعورون جانلانماسيندا، ميللی اسارته سون قويماقدا، ميللی آزادليقا چاتماقدا ان يوکسک رول اويناياجاقدير!
آذربايجان ميللی جبهه سی
|
