|
مير موسي هاشمي آذربايجان ميللی جبهه سينده تشکيلات مسئولو: غير دموکراتيک شکيلده فدراليزم آخينينا قاتيلماقلاری نين شاهدی اولدوق حورمتلی شمس سايتی نين مدير مسئولو، حامد بيگ! هر شئی ده ن اؤنجه فرصت ده ن فايدالانيب سيزی و شمس سايتي نين امکداشلارين هابئله آذربايجانيميزين آغير- آغير دردلرين اؤرکلرينده و وارليغی تالان اولان آذربايجان تورکونون امکلرين چيينلرينده داشايان غيرتلی باجی و قارداشلاريمی صميم قلب ده ن سالاملاييرام. و اولوتانری دان هامييا جان ساغليغی و ميللی، مدنی چاليشمالاريندا باشاريلار ديله ييرم. سورغولارينيزين جوابلاری آشاغيداکی کيمی، تقديم اولونور:
سايت شمس: هاشمی بيگ سيز، آذربايجان ميللی جبهه سينده نه وظيفه داشييرسينيز؟ مير موسي هاشمي: من آذربايجان ميللی جبهه سينده تشکيلات مسئولو وظيفه سينده چاليشيرام.
سايت شمس: آذربايجان ميللی جبهه سی نين يارانما سببی نه دير؟ مير موسي هاشمي: بيلديگينيز کيمی، ايرانين سياسی خريطه سينده ياشايان اهالی نين ياريسيندان چوخونو تشکيل ائدن آذربايجان تورکلری دير اؤزلليکله (خصوصيله) جنوبی آذربايجان ! سون عصرده ن باشلاياراق، بو خالقين ميللی وارليغی ضدد اينسانی متودلارلا يوخا چيخماقدادير. بو فلاکت لره سون قويماق اوچون آذربايجان ميللي جبهه سي وطنداشلاريميزين ميللي طلب لريني حياتا کئچيريلمه سي يولوندا چئشيتلي ايجتماعي، سياسي شخصلردن وگروپلاردان عبارت ۲۰۰۳-نجي ايل مارت آيي نين ۲۱ ده ياراندي.
سايت شمس: بو جبهه نين يارانماسيندا هانکی شخصلر ايشتراک ائتميشلر؟ مير موسي هاشمي: البته بوردا کيمسه ده ن آد آپارماغی هله اويغون بيلميريک، بونا گؤره کی بوتون ائلينه- اوباسينا يانان و وطن سئور سويداشلاريميز قيسا مدت- اوزون مدت تمناسيز امک صرف ائديب و هله ده چاليشيرلار و آدلاری جبهه نين تاريخينده ثبت اولموشدور و واختی گلديکده اؤز ايشلری اونلاری خالقيميزا تانيتديراجاقدير.
سايت شمس : جبهه نين آماجلاری و خط مشی نه دير؟ مير موسي هاشمي: اينسان حقوقلارين اساس توتاراق، بين الخالق اؤلچولره دايانيب، تاريخي تورپاقلاريميزدا ياشايان هر بير انسانين ميللي حقوقلارينين قورونماسي، هربير وطنداشين سئچيم حاققي نين تانينماسي، عموميتله جنوبی آذربايجاندا! ميللي قورولوشلاريميزين (پارلمنت، اجرا حاکميتي ومحکمه لر) يارانماسي.
سايت شمس : کئچنلرده لندن ده برپا اولونان ميللتلر کنفرانسيندا سيزده ايشتراک ائتميشدينيز. لطفا نظرينيزی بو ساحه ده آچيقلايين؟ مير موسي هاشمي: 2005- نجی ايل فورار آيی نين 19 دا، لندن جلسه سی نين برپا ائديلمه سيندن خبرسيز ايديم، آنجاق نئچه گون قالان امکداشلار طرفيندن ماموريت وئريلدی کی، بو اجلاسدا اشتراک ائده ک. آوروپادا اولان تشکيلات مسئوللاری نين بيری ايله، بيرگه AMC – طرفيندن اجلاس دا ايشتراک ائتديک. جلسه نين يئتگين اولماماغی و پان ايرانيست لرين بارماق ايزلرين چوخ ئتز دويدوق و اعتراضيميزی ائله اوردا بيلديره ره ک، سونرا دا آنا يوردو تلويزياسيندا بو ساحه ده بيلگی وئرديک. کوردستان دموکرات پارتياسی، بلوچستان متحد جبهه سی ايران اسلام حاکميتين يخيب و بو اؤلکه ده فدرال حاکميتی قورماق اؤزرينده آرتيق چابا گؤسترمکلرين گؤزده ن قاچيرماق اولمازدير. حتی بو ايکی تشکيلات، ميللتلرين اؤزلری- اؤز قدرلرين الده ائتمه لرينه بئله منفی ياناشماقلاری اشتراکچيلاری تعجب لنديردی. آمما آذربايجانليلارين اوست- اوسته بير موقعدن چيخش ائتمکلری سئويندريجی ايدی. فيکيريميزجه آذربايجانليلار حاکميتلری ييخيب ياداکی دستکله مک ده ن اوزاق قالماليديرلار، چونکی هرحکومت اقتداردا اولورسا- اولسون، آنجاق پهلویلر چاغيندان ميراث بوراخيلان بير ضد ميللی سيستيم بوگونه قدر حاکيم اولوب و هله ده اولاجاقدير. بو فاکتی نظره آلاراق آذربايجانلیلار يالنيز و يالنير پتانسيل لرينی اؤنجه جنوبی آذربايجاندا! آذربايجان تورکلري نين کيمليک سيزليک دورومونا، فلاکت لرينه سون قويماسينا قوللانماليديرلار. بو ميللی نائليتی الده ائتمگه آذربايجان دا او قدر پتانسيل وار کی، هر حکومت اولور- اولسون، اينسان حقوقلاری قارشيسيندا ديزه چؤکمه ليديرلر. و بو مبارزه نی ساغلام آپارماغا چاليشيريق. و اؤزگلر اليله آلينان آزادليق معيين چاغدا ائله اؤزگه لر واسطه سيله اليميزده ن آلينار. آجی تجربه لری تکرار ائتمگه خيانت ده ن باشقا بير شئی دئمک اولماز!
سايت شمس: آذربايجانی ميللی جبهه سی نين موقعی کنفرانس اوچون نه ايدی؟ مير موسي هاشمي : آذربايجان ميللی جبهه سی بئله حساب ائديردی کی، فارس شوونيزمی نين تخريباتينی انگلله مک اوچون ميللی ستمه معروض قالان بوتون ميللتلر بير يئرده معاصر اولمايان و غير اينسانی سياسته قارشی مبارزه آپارماليديرلار. بوتون ميللی ده يرلرينی ايتيرمکده اولان ميللتلرين بيرينجی و گرچک متفقلری اؤزلری دير. يعنی تورک، ترکمن، عرب، کورد و بلوچ اولاراق فارس شوونيزمينه قارشی بيرليک جبهه سی تشکيل ائديلمه ليدير. غلبه نين تملينده ده بو بيرليک دوشونجه سينين و دويغوسونون اورتايا قويولماسی دورماقدادير. ياشاماسی ممکون اولان و اينسانی بير دونيانين برپا ائديلمه سی اوچون بو بيرلييه احتياج واردير.
سايت شمس: لندن کنفرانسی نين بيانيه سي، ايران حاکمييتين ييخيب و سئکولار حکومت يارادما قدان عبارتی دير. دوقتور نظمی ده .... صدری اولاراق آنا يوردوندا بو موضعنی تائير ائديب ودئدی کی، بيز ده ايران حاکميتی نين قالديريب و فدرال حکومت يارادماق نييتينده ييک. و سونرا آذربايجان ميللی جبهه سی ايران حکومتين ييخيب و فدرال حکومت قورماق اؤزرينده اؤز مخالفتين گؤستريب و.... سايتيندا بو ساحه ده بيلديريش ياييلميشدير. جبهه ايچرسينده نه حادثه اؤز وئريب دير؟ آنجاق کيم سبب اولموش ...... حاکمييت سالماق استقامتينه يونلسين؟ نئجه اولدوکی، دوقتور نظمی جبهه طرفيندن گنجيلرين عسگری تشکيلاتلاشمالارين خاطيرلادی؟ بو آرا دا آذربايجان ميللی جبهه سی نين موقعی، دوقتور نظمی ايله ظاهرده فرقلی دير، قضييه نه ده ن عبارت دير؟ نئجه اولدو کی، بئله بير نتيجه يه يئتيشييب و بيانيه يايميسينيز؟ و بو آرادا دوقتور نظمی نين موقعيتی نه اولاجاق دير؟ مير موسي هاشمي : بيز يالنيز فورار آيی نين 19 –نجی گونو، اوچ اؤنملی موضوع يعنی«ميللتلر اؤزلری- اؤز طالعلرين الده ائتمک، دموکراتيا و سئکولاريزم» اؤزه رينده راضيلاشديق و عموميتله بوساحه ده بيلديريش ياييلدی. آمما کوردستان دموکرات پارتياسی و بلوچستان متحد جبهه سی اؤنجه اشاره ائتديگيم کيمی سرت (محکم) شکيلده فدراليزمدن مدافعه ائده ره ک بو بيلديرشه ياناشماديلار. فورارين 20 – نجی گونو، آدی چکيلن ايکی تشکيلاتين تشبوثو ايله فدرالچيلار اجلاس تشکيل ائده ره ک، اورتاق حالدا 8 ماده لی بير بيلديريش يايميشلار و بو بيلديريش ده ايران حاکميتين ييخيب و بو اؤلکه ده فدرال حکومت ياراتماغی قيد ائتميشلر. آذربايجان ميللی جبهه سی نين سؤزچوسو، عليرضا نظمی بيگ و امکداشلاردان بير باشقاسی فدراليزم آخينينا ماراقلی اولاراق بو آخينا قوشولماغی ضروری سانديلار. ائله جه مارت آييندا باشقا امک داشلاردان مصلحت آلمادان، غير دموکراتيک شکيلده فدراليزم آخينينا قاتيلماقلاری نين شاهدی اولدوق. و من باشقا شورا عضوی لری و تشکيلات مسئوللاری ايله دانيشب و نظمی بيگين اؤز باشينا حرکتينه سرت (محکم) اعتراض ائده ره ک، اونا ايکی فقره آچيق مکتوب يازديب و گؤندرديم. تاسفله مکتوبلار جوابسيز قالدی و بيرداها تلفون دا اعتراضلاريميزی بيلديريب و مکتوبلارين جوابين ايسته ديم. تاسفله، نظمی بيگ دئدی کی: مکتوبلارا جاواب وئرمک نييتينده دگيلم! نظمی بيگ جبهه نين سؤزچوسو کيمی فدرالچيلارا قاتيلماسی سبب اولمازدير کی، AMC ده باشقا امکداشلاري نين فيکيرلرينه خصوصيله گونئی ده فعاليت گؤسترن باجی و قارداشلاريميزا لاقيد قالسين. خصوصی ايله جبهه نين تشکيلات بؤلوم لرينده فعاليت گؤسترن امکداشلاريميز و حتی جبهه دن خارج باشقا وطنداشلاريميز کی هر چاغدا اونلارين معنوی يارديملاريندان فايدالانميشيق، هامی، جبهه نی تهليکه لی ميدانلارا سوق ائتمکدن نگران قالميشلار. و بو فيکيرلری توپلاياندان سونرا سرت تصميم توتدوق داها گئج اولمادان بو ماجرانی آچيقلاياق. دئمه ليم کی، آذربايجان گنجلري نين گله جک حادثه لر اؤزرينده حاضير ليق گؤرمکلری، آذربايجان ميللی جبهه سی نين جدی تشبوثو سانيريق، نظمی بيگ جبهه نين سؤزچوسو کيمی بو اؤنملی مسئله نی آنا يوردون دا يايميشدير. ياخشی ياديمدادير کی، گونئیدن گلن بعضی سئواللارا گؤره، بير داها بو ساحده ايضاحات وئريلدی کی، آماجيميز بو حاضيرليقدان اسلام حاکميتی قارشسيندا دگيل، بلکه تاريخين آجی تجربه لريندن درس آلاراق، گله جک ده هر نوع آجيناجاقلی حادثه لر قارشيسيندا آذربايجانين قاريش- قاريش تورپاقلاريندان مدافعه ائتمک دير. بئله بير حاضيرليق تانينميش دشمنلريميزدن سونرا باشقالاری نين ضررينه دگيل. آذربايجان ميللی جبهه سی نين ايچرسينده و ائشيگينده سياسی تجربه داشايان اؤرکلری تميز و سارسيلماز اراده لی سويداشلاريميز وار. بو جبهه نين تملين قورماقدا چوخلو امک صرف ائده ن سويداشلاريميزين فيکيرلری يئرلشييب دير. بو جبهه ده دموکراتيانی قورويان پرنسيپ و انظباط حاکم دير و اؤزباشيناليغا يئر يوخدور و شخصيت پرستيليگه و يالتاقليغا و... مطلق ده يئر وئريلمز. بو جبهه ده شخصی يارار يوخ، بلکه ميللی يارارلاريميزی قوروماق ايده آللاری ياشايير. بو جبهه نين ايچينده و اؤزلليکله چئورسينده آذربايجان حقيقتين رئال شکيلده دوشوننلرين سايی آز دگيل. گونش پارتياسی نين صدری منوچهر عزيزی بيگ کئچن ايل قوناغيميز اولاراق آوروپا سفرينه گلميشدی. من، اؤنجه عزيزی بيگه دئديم کی، آذربايجان ميللی جبهه سی هله ضعيف دير و ايستديگيميز کيمی گوجلنمه ميشيک! عزيزی بيگ ايله من بيرگه، آوروپا شهرلرينده آذربايجانلی وطنداشلاريميزين توپلانتی لاريندا دا اشتراک ائتديکده، عزيزی بيگ دفعه لر بئله دئدی: «داها ضعيف اولماغينيزی تکرارلامايين! چونکی گئتديگيميز جغرافيالاردا وطنداشلارين حسن و رغبت لري نين آذربايجان ميلی جبهه سينه گؤره يوخوندان شاهدی اولدوم و من بو ايشده هامينيزا داها يوکسک باشاريلار ديله ييرم.» بوگون جبهه ساغلام بير آتمسفر ده سرعتله ايره لی له يير. قورولتای برپا اولونانا قدر جبهه نی قورويوب و گوجلو کادرلارلا، خالق نماينده لرينه تقديم ائتمگه چاليشيريق!
سايت شمس: سيزين فيکيرينيزه گؤره آذربايجان ميللی جبهه سی نين يئنی موقعی خارجده کی آذربايجان اوپوزوسيون حرکتينده نه دئييشيکلر وئره بيلر؟ مير موسي هاشمي: آذربايجان ميللی جبهه سی نين موقعی اؤنجه ده ن ده بئله ايدی، يعنی ايران دا حاکميت دئييشيب و پان ايرانيست قووه لرين اقتدارا چاتديرماغا مطلق ماراقلی دئييلديک. مهاجرت ده ياشايان سياسی تشکيلاتلار، ائلييه بيلمز مستقيل شکيلده، داخل ده کی، عمومی دورومو و سياسی شرايطی نظرده آلمادان خالقيميزا استراتژی پلانلاسين. محض، خارجده کی تشکيلارتلارين سياسی فعاليتلری گونئی آذربايجانين سياسی دوروموندان آسيلی اولماسی گرکدير، چونکی ايران دا آمانسيز استبداد حاکيمدير. خالقيميز اؤزلليکله (خصوصيله) ميللی فعاللاريميز گونو- گوندن آغير باسقی و تضييقلره معروض قاليرلار. آيدين دير کی، ايچری مبارزلری نظرده توتمايان هر بير تشکيلات، ميللتيميزين اراده سی ايله کؤلگه يه بوراخيلاجاق. بو سون چاغلار دا وطنداشلاريميزين آذربايجان ميللی جبهه سی نين مستقيل تدبيرلرينی بيرداها آلقيشلاماقلاری بوتون امکداشلاري سئوينديردی. اورتا دوغودا (خاورميانه ده) سرعتلی دئييشيکلرين اثری بيزيم جغرافيا دا تاثيرين بوراخماقدادير. گله جکده باشقا تشکيلاتلاريميزدا اولان وطنداشلاريميزلا، علاقه لرين سيخلاشماسی و معيين تدبيرلرين حياتا کئچيريلمه سی اوغروندا چاليشانلار چوخدور و نهايت بوتون اوغورلو دئييشيک لر اورتايا چيخماسی وطنداشلاريميزين آرزيلاری دير. سون
حورمتله : ميرموسی هاشمی 1-6-2005مالمو- ايسوچ
|
