|
سايت شمسين اوزل دانيشيقي مير موسي هاشمي آذربايجان ميللی جبهه سينين تشکيلات مسئولو: خارجده کی تشکيلاتلار هله ضعيف حالدادير
هاشمی بيگ! کئچنلرده خبردار اولدوق کی، آذربايجان ميللی جبهه سی ايله علاقه دار، بو کئچنلرده ترکيه سفر ينده اولموسونوز. بو سفردن آماج نه ايدی و جبهه يه، همچنين آذربايجان ميللی حرکتينه نه لر الده ائتدينيز؟
-
ايران دا، غيردموکراتيک آتمسفرين حاکيم اولماسی، اؤزلليکله دولتين، ميللی و مدنی
فعاليت لر اؤزرينده وطنداشلاريميزا تؤرتديگی آغير شرايط هاميميزا آيدين دير.
ايچريده گؤروش امکانی اولماماديغينا گؤره، تاسفله گؤروشلرخارجده کئچيريلير. بودفعه
ده اويغون اولدوغونا گؤره ترکيه نی سئچديک. شبهه سيزکی، آذربايجان ميللی جبهه سی ( ( AMC خارج ده کی تشکيلات لاردان بيری ساييلير و آذربايجان مسئله لری اوغروندا فعال دير. AMC، آذربايجان مسئله لرينه نئجه باخير؟
- سورغونوزو بئله جوابلانديرماق ايسترديم: ايران دؤولتی طرفيندن، آچيق شکيلده
خالقيميزين ميللی حقوقلاريندان محروم ائديلمه سی و خالقيميزين کيمليک سيز ياشاماسی
بوتون دونيايا آيدين دير. تاسفله بو غير اينسانی سياست گونو- گوندن دوام ائتمکده
دير. بوتون کولتورال، ايجتماعی و سياسی فعاليت لر چئشيتلی متودلارلا ياساق دير.
حتی بو سون اولايا (حادثه يه) باخين! آذربايجان فعاللارينی، رحمتليک باقرخان
مزاری اوسته فاتحه اوخوماقدان دا، بئله محروم ائتميه چاليشديلار. و گناهسيز
سويداشلاريميز، غير دموکراتيک قووه لرين يوروش لرينه معروض قالميشلار. تصادفی
دئييل کی، حاکمييت بوتون وار و قووه سيله خالقين آيدينلاشماسی نين و توپلاشمالاری
نين قارشی سين آلماغا چاليشير. بو آغالار! ياخشی بيليرلر کی، خالق آيدينلاشارکن،
تام گوجو ايله اؤز ميللی وارليغين، ميللی آزادليغين قورويوب و اوندان مدافعه ائتمگی
باجاراجاق. فاکتلار گؤسترير کی، ايران آدلی غير دموکراتيک اؤلکه ده، ميللی ظلم ده
ن قورتارماق بير گونده ممکون دئييل. و بو مبارزه چوخ متانت و دؤزوم طلب ائدير. AMC – نين استراتژی سی، آذربايجان ميللی حرکتينه گؤره نه دير؟ - عموميتله آذربايجان ميللی جبهه سي نين مقصدی، اينسان حقوقلارين اساس توتاراق بين الخالق اولچولره دايانيب، گونئی آذربايجانين تاريخی تورپاقلاريندا، آذربايجان ميللتی نين اراده سی ايله اؤزو – اؤز مقدراتين الده ائتمه سيندن عبارت دير. آرزو ائديريک کی، بوتون آذربايجان ميللی حرکتينده ده بئله بير چاغداش و شفاف آماج تئزليکله اورتايا چيخسين. خارجده کی تشکيلاتلارين موقعيتی آذربايجان ميللی حرکتينه نئجه دير؟
- ياخشی بيليرسينيز کی، هله آذربايجان ميللی حرکتی منتظم شکيلده ، واحد پلاتفورم
اؤزرينده، اؤز پرنسيپ لری ايله چيخيش ائتمير. و بو حرکت قارشيسيندا تؤرنه ن
چاتيشمامازليقلاری، سيزلر ايچريده داها ياخشی گؤرورسونوز. بو سبب لره گؤره،
آذربايجان ميللی حرکتی، مهاجرت ده ياشايان آذربايجانليلاری، هله بوگونه قدر اؤز
تاثيری آلتينا آلماقدا نائلييت الده ائتمه میشدير. آذربايجان پروبلم لري نين حللينده، AMC – نين تشبوسو نه دير؟
- بيرينجی، خالق اؤز منليگينی- کيمليگينی تانيمالی دير. بئله بير تدبيرده پان
ايرانيست لرين بوش داغارجيقلاری آچيلماقلا، آلداديجی تبليغات لاری کسردن دوشر.
آذربايجان ميللی حرکتين تهليکه ده ن قورويوب و هدفه وارماق اوچون، آشيری حرکت لره
يول وئرمه مه لييک. اؤزلليکله گنجلريميزين توکنمز پتانسيل لريندن خالقی آيدينلاتما
اوغروندا نهايت درجه ده فايدالانماق گرک دير. خارجده کی آذربايجان فعاللاری نين، آذربايجان ميللی حرکتی اؤزرينده نه وظيفه سی اولا بيلر؟
- بيزينم فيکيريميزجه خارجده کی فعاللارين ان اؤنملی وظيفه سی، گونئی
آذربايجانليلارين بوغولموش سسينی، بوتون دونيا ايجتماعيتينه، بين الخالق اورگانلارا
چاتديرماق دير. خارجده مادی و معنوی پتانسيله مالک اولان آذربايجانليلارين
ايناملارين قازانييب و آذربايجان ميللی حرکتی اوغروندا قوللانماقدان عبارت دير. آذربايجان ميللی حرکتی نين انکشافيندا رکود حيس ائديلير. اگر سيزين نظرينيزجه بئله دير، بو دورومدان نئجه چيخماق اولار؟ - فيکيريمه گؤره، آذربايجان ميللی حرکتی بو سون 10 ايلده آغير شرايطه باخماياراق، انکشاف پروسس لرينده دير. آمما خالقيميزا لاييق هله اؤز يئرين توتماييب دير. خاطيرلامالييام کی، فعاللار آراسيندا علاقه لرين و مناسبت لرين گئنيشلنمه سی، دموکراتيا پرنسيپ لرينه حؤرمت بسله مک، منليک لره، يئر وئرمه مک، خالقين ايستگی و اؤز ديلی ايله خالقا ياناشماق، مطلق آذربايجان ميللی حرکتی نين انکشافيندا يوکسک رولو اولاجاق. آذربايجان ميللی حرکتينده ايدئولوژو رولو اولماسينا چئشيتلی نظرلر واردير. بعضلری اونو بوتون رد ائدير. بعض لری سول قووه نی آذربايجان ميللی حرکتيندن طرد ائتمگه اينانير. آذربايجان ميللی جبهه سی بو مسئله يه نئجه دوشونور؟ - بيزيم درديميز بوگون تکجه سول قووه دئييل. ساغيندا دا، دينچی سينده ده و... ايده ئولوژو اسارتينده قالانلار آز دئييل کی، هله ده آذربايجان ميللی حرکتينه شبهه لی باخيرلار. بعضی لری نين، ايران اپوزوسيونو ن دا فعال اولاراق ميللی حرکتين تام ضدينه چاليشمالارينی گؤزده ن قاچيرماق اولماز. آيدين دير کی، بيز ده، بو آداملارا تام شبهه لی باخيب و اونلارا اينانميريق. عکسينده، اؤز ايده ئولوژو سوندان آسيلی اولمايان سويداشلاريميز وارديرکی، بوگون آذربايجان ميللی حرکتی اوغروندا وار و قؤوه لری ايله چاليشيرلار. AMC، اؤز ميللتيميزه باغلی اولان بوتون سويداشلاريميزی، هر هانسی فيکيره مالک اولور- اولسون آنجاق، آذربايجان ميللی حرکتينه اينانيرسا، صميميتله آلقيشلايير. چونکی آيری- آيری فيکيرلره حؤرمتله ياناشماق، گله جکده دموکراتيانی چيچک لنديرمک و انکشافينا يارديم ائتمک دئمک دير. آذربايجان ميللتی نين پارلاق تاريخی و گئچميش تجربه لری، AMC – نين تملين تشکيل ائدير. و بيز بو جنبه لرين ان ياخشی سين، يعنی (وطن پرورليک، آزادليق، ترقيخواهليق و عدالت پرورليک ده ن) سياسی فيکيريميزی يارادميشيق! ميللی حرکتده بعضی اختلافلارين اولماسينا نه دوشونورسونوز؟ -عموميتله، بعضی اختلافلار ناساغليم رغابت لردن تؤره نير. لاکين، آذربايجان ميللی حرکتی اؤز استقامتينده قول- قاناد آچيب گوجلنديکجه، اختلافلاردا اؤز حلينی تاپيب و سونا چاتاجاقدير. بابک قالاسی مراسيمی آذربايجان ميللی حرکتی نين قاباريق(برجسته) نقطه سی دير، تاسفله حاکمييت بو ميللی مراسيمين قارشی سين آلماقدا غيردموکراتيک داورانيشلارا ال ووردو. AMC نين بو ساحه ده نظری نه دير؟ - هامی بيليريک کی، بابک قالاسی مراسمی آذربايجانليلار اوچون، اهمييتلی خاراکتر داشايير. ميللتيميزين هر ايل تير آيی نين 9- 10 دا اعتراض سسلری بو مکان دا مدنی شکيلده يوکسلمکده دير. و بو حقيقتی اينکار ائده نلر، يا جاهيل دير يا دوشمن! تاسف لر اولسون کی، هر ايل، دؤولت مامورلاري نين چيرکين داورانيشلاری، حاکميتين ضعفين داها آرتيق نمايش ائدير. دوغوردان داکی، ايسلام حاکميتی نين، اؤز وطنداشلاری ايله دشمن کيمی داورانماسی، آجيناجاقلی حال دير. ميللی و مدنی مبارزه ميزله علاقه دار، کئچميشدن بير آلجيناجاقلی اؤرنک خاطيرلامالييام: «پهلوی حاکمييتی نين جنايتلری گؤز اؤنونده دير! بو استبداد حاکميت 1325- نجی گونش ايللرينده آذربايجان ميللی حکومتين وحشيجه سينه، قان درياسيندا بوغدو. سونرالار پان ايرانيست ئتورسين لری، بئش دانا معروف فراماسونر لژلارين( لژ کوروش1960- لژ اصفهان 1968- لژخيام 1962- لژ آريا 1960 و لژ صفا 1963) ميلادی ايللرينده ياراتماقلا آذربايجان تورکونون آسيميلاسييا سياستی شدتله دوام ائتدی. ايسلام حاکميتی برپا اولارکن، بو لژلارين پاياسی تيتره سه ده، آنجاق، يئنه اونلارين عامل لری ايسلام حاکميتينه سوخولوب و آذربايجان تورکونه قارشی غير اينسانی داورانيشلاري دوام ائتدی.» گؤره سن، بو گونه قدر ايسلام حاکميتی آديله خالقيميزا اولونان عدالتسيزليک لری اونودماق اولار می؟ گؤره سن، دؤولت باشچیلاری و اؤزلليکله حاکمييت ده اولان آذربايجانليلار، يئنی نسيللره جاوابلاری اولاجاق ديرمی؟ البته کی يوخ! لاکين، دؤولتين غيراينسانی حرکت لری يوخون مدت بو آغالارا فايدالی اولا بيلر. آمما اوزون مدت ده مرکزی حاکمييت عموم خالقيميزين عصيانی قارشيسيندا، بئله بير ساعات دا داوام گتيرمه گه امکان تاپا بيلميه جک. و بو حقيقته بوتون وارليغيملا اينانيرام. سيزده اينانين! آذربايجانليلار هئچ زامان زوراکيليق وظولم قارشسيندا باش ايمه ميشلر و تاريخ بو حقيقتی ثبوت ائدير. حتی بو آغالار! پهلوی لر چاغیندان، امنيت دايره لرينده قالان آرشيولره مراجعت ائديرسه لر، آيدين اولارکی، بو گيزلی سندلرده بئله يازيلييب: « آذربايجانليلاردان زوراکيليق و تحقير شيوه لری ايله اعتراف آلماق ممکون دئييل، چاليشين اونلاردان باشقا متودلارلا اعتراف آلين». فيکيريميزجه، ايران دؤولتی نين غيردموکراتيک داورانيشلاری بابک قالاسی مراسيمی و يا باشقا مدنی حرکتلريميزده دوام ائديرسه، گله جکده بوتون کندلرده و شهرلرده آشيری شکيلده خالقين اعتراض يوروشلري نين شاهدی اولماق اولار! و آذربايجان ناسيوناليزمی نين آتشی يئر آلتيندان پوسگوروپ، پان ايرانيست لرين طالع لری 1991- نجی ايللرده کی کيمی، روس شوونيزميندن آيری اولا بيلمز!!
تازاليقدا شمس سايتيندا يئني ائتلافلاردان حركت ميللينين ايكينجي بولومونده سوز آچيليبدي.آذربايجان ميللي جيبهه سينين باخيشي بو ائتلافلارا نئدي؟ - بلی. شمس سايتيندا کئچنلرده ائتلاف اؤزرينده، چاغيريش اولموشدور. اؤز يئرينده، گؤزل تدبيردير. هر ائتلاف يئتگين اولورسا AMC او، تدبيری آلقيشلاياجاق. محض، آذربايجان فعاللاری و تشکيلاتلاری آراسيندا ائتلافی هر کس ضروری سانير. آمما، قبول ائتمه لييک کی، هر هانسی بيرائتلاف دان اؤنجه، نئچه اساسی مسئله نين اؤن پلانا چکيلمه سی گرک دير. او جمله دن، تشکيلاتلارين، دانيشيق دا يوخ! تئوری و کاغيذ اوسته يوخ! بلکه رئال شکيلده گوجلنمه سی، ايش بيرليگی نين حياتا کئچيرمه سی، اورتاق نقطه يانقطه لرين معين لشمه سی، هر شئی ده ن اؤنملی ائتلاف پرنسيپ لرينه هرکسين يا تشکيلاتين صادق قالماسی ان اؤنملی مسئله لردن دير. البته کی، بئله بير تدبيرده، دوزگون ائتلافی گؤروب و اينانماق ممکون دور. عکس تقديرده، اولچولوب- بيچمه ميش هر هانسی بير ائتلاف ايشيقلی اولدوز کيمی يانييب، تئزده سؤنه ر. ائله کيچيک- کيچيک توپلوملاردا و تشکيلاتلاردا، بئله بير اولايلاری ياخيندان گؤروب يا داکی، ائشيدميشيک. آذربايجان فعاللارين بوش اتهاملانديرماق، بعضی مدنيت سيز داورانيشلار و... قارشيميزدا، چتينليک لردير کی، آذربايجان ميللی حرکتی نين سرعتين آلير. سيزين فيکيرينيزجه نئجه بئله بير ياراماز داورانيشلاردان، حرکتی قوروماق اولار؟ - عموميتله بير- بيرینی اتهاملانديرماق، سويه سيز کولتور کيمی چوخ يئرلرده اؤز قارانليق کؤلگه سين سالميشدير. آمما، بو داورانيش تصادفی حال دئييل. بو روحيه – احوالين ديرچلمه سينده آشاغيداکی، ايکی عامله اشاره ائتمگ اولار: بيرينجی: منليک، قيسقانجليق، شخصی عداوت، شخصی يارار، محض ناساغليم رغابت لر اؤزرينده اورتاياچيخير. ايکينجی: پرده آرخاسيندا قارا قووه لر طرفيندن تهليکلی متودلارلا پلانلانميش شکيلده قايغی کش وطنداشلاريميزی بوش اتهاملارلا تحقير ائتمگه چاليشانلاردير. بئله ليکله فعاللاريميز ايچرسينده، اينامسيزليق و پراکنده ليک ياراديب، نهايت آذربايجان ميللی حرکتينی تضييق ائتمگه جان آتيرلار. اؤزلليکله هاميميز بو چرکين حرکتين، بو سون ايللرده شاهيدييق. البته کی، بارماق سايی ايچيميزه سوخولوب توطته ائدن آداملار اوچون بعض اتهاملاردا دوغرودور. آمما قيد ائتمه لييم کی، ايکينجی عامل، چوخلارينا اتهام ياغديرماق آماجی ايله، گرگين آتمسفر يارادماق نييتيتده دير. بلکه اصل توطئه چيلر بو فرصت ده، قول- قاناد آچيب و چرکين مقصدلرينه نائل اولسونلار. قيد ائتمه لييم کی، اؤزونه اينانييب و تمناسيز اؤز خالقی نين سعادتی اوغروندا چاليشان هر بير آذربايجان فعالی، بوش اتهاملاردان قورخماماليدير. آتالار دئميشکن: «... هو ره ر، کروان کئچر» بعضی لری نين غيرمدنی داورانيشلاری حاققيندا دا بئله ايضاح ائتمه لييم: بير دوشونجه يه مالک اولان اينسانين، دويغولاری دا دوشونجه سيندن آسيلی دير. آيدين ديرکی، بئله اينسانلارین داورانيشی دا مدنی شکيلده اولار. عکس تقديرده، دوشونجه يه مالک اولمايان هر بير اينسان، يالنيز دويغو اؤزرينده دوشونوب و غير مدنی حرکت له ره، ال آتماقلاری طبيعی حال دير. آنجاق، بوتون چتينليک لره سون قويماق آذربايجانين صادق اولادلاری نين پرنسيپ لری نظرده توتاراق منتظم شکيلده، دؤزوملو، کسکين و صميمی داورانيشلاريندان آسيلی دير.
|
