|
19 فورال لندن ده «ايراندا
ائتنيک پروبلم» آدينا کئچيريلن کنفرانسدا
آذربايجان ميللی جبهه سی نين ايفاده ائديلن رسمی موقعی
سويوق ساواش
بيتندن درحال سونرا کومونيزم- ليبرال دموکراسی قارشی دورماسی اؤز يئرينی
ميللتلرين اويانيشينا بوراخميشدير. اولوسلار آراسی مناسبتلره حاکم اولان ايده
لوژيک ياناشما تاريخين قارانليقلارينا بوراخيلميش و ميللتلر حاقلی اولاراق اؤز
کيمليک و کولتورلرينی آنلاماغا باشلاميشدير. اصلينده بو نوع تکامل ايستيقامتينه
حاکيم اولان ديالئکتيک روح داها اؤنجه ده موجودی ايدی. يعنی 1789- جی ايل
بؤيوک فرانسا انقلابيندان سونرا سئکولار ذهنييت اورتايا چيخار چيخماز ميللی
دؤولت اولما ايسته يی سرعتله دونيا خالقيلاری نين گونده مينه اوتورموش و 20- جی
عصرين باشلارينا قده ر بير چوخ ميللی دؤولتلر قورولموشدور. لاکين 1917-جی
روسيادا باش وئرن سوسياليست انقلابيندان سونرا ميللتلشمه حرکتی نين سرعتی
آزالميش و ايده لوژيک جبهه لشمه لر ميدانا چيخميشدير. سوويت لر بيرلييی
داغيلاندان سونرا تکرار ميللت لشمه و ميللی دؤولت اولما دالغالاری قابارماغا
باشلاميشدير. بيرلشميش ميللت لره عضو اولان دؤولتلرين سايی تکرار
آرتميشدير. بو آرادا بونو دا سئويله مکده فايدا وار کی، تاريخين، اولايلارا
بو جور ايده لوژيک ياناشما دؤولونده ده گونئی آذربايجاندا ميللی حاق آنلايشينی
آذربايجان ميللی سياستچيلری تاريخيميزده جانلی توتماغی باشارميشلار. 21 آذر و
پيشه وری اؤندرليينده باش وئره ن حادثه سئويله ديکلريميزين
تشخيصی
اوچون مناسب اؤرنک دير.
بو گون ايسه هم دونيا، هم اورتا دوغو يا هم ده ايرانا حاکم اولان مناسبتلرين
ماهيتی فرقلی دورومدادير. آوروپا بيرلييی دؤولتلر لاييک دؤولت اولما اؤزه رينه
اصرارلارينی سوردورمک ده ديرلر. 2004- جی ايلده رومادا آوروپانين اوزون مدتلی
گله جه يينی تاثير آلتينا آلان بير آنلاشما امضالاندی. مسلمان اؤلکه
لردن يالنيز ترکيه نين قاتيلديغی و امضاء ائتديغی بو آنلاشما تؤره نينده
بو اؤلکه لرين اوزون وعده ده سياسی ايداره اولونما شکيلی معين ائديلدی. بو
اؤلکه لر دينين سياستده ن آيری قالماسی اوچون آنلاشديلار.
مدرنيزمين دالغالاری بلکه بير آز گئج، آنجاق هر حالدا اسلام اؤلکه لرينی ده اؤز
تاثيری آلتينا آلميشدير. بو سبب ده ن ده اندونوزييا اؤرنيينده
اولدوغو کيمی بير چوخ اؤلکه لرده ان طبيعی ميللی حاقلاری اينکار ائديلن
ميللتلر بير اويانيش مرحله سينه قدم قويموشلار.
اينسان حاقلاری نين و دموکراسی نين واز کئچيلمز پرنسيپلريندن بيری ده ميللی
حاقلاردير. ميللی حاقلار اوغروندا ايراندا ياشايان ميللتلرين يئنی بير تاريخی
مرحله يه گيرديکلرينه شاهد اولماقداييق. بو ميللتلرين حاقلارينی مدافعه
ائتمک اوچون داخيلده و خاريجده قورولان مختلف تشکيلاتلار ميللی اويانيش حرکتی
نين گؤرونن ظاهر طرفی دير. ميللتلرين ميللی داورانيشلاريندا، حادثه لره
ياناشما طرزلرينده و ميللی روحلاريندا ايسه بؤيوک بير اويانيشين اورتادا
اولدوغو بير گرچکليک دير. بو اويانيش ياراداجاغی تاريخی حادثه لره
بلکه گله جک زامانلاردا شاهد اولا بيله جه ييک.
بيز، آذربايجان ميللی جبهه سی اولاراق گونئی آذربايجاندا ميللی حاقلاريميزی
چاغداش، سويل ، اينسان حاقلارينا اويغون شکيلده و دموکراتيک
يوللارلا مدافعه ائتمه يه چاليشيريق. بو سببدن ده اؤز ميللی حاقلاريميزلا
باغلی اولاراق بعضی ملاحظه لرده بولونماق ايسترديک.
هر کسه معلوم دور کی، پهلوی فارس ايرقيچيلينه دايانان، اينسان حاقلارينا و
ميللتلرين حاققينا حؤرمت ائتمه ين غير اينسانی بير رژيم ايدی. پهلويلرين
زامانيندا ميللتلرين روحونا ائله ضربه لر وورولموش کی، بو تخريباتی اورتادان
قالديرماق هله ده زامان طلب ائتمکده دير و بعضي ده جبران اولونماز.
ايراندا انقلاب اولدو، رژيم دييشدی، لاکين پهلويلرين ميراثی اولان باشقا
ميللتلرين حاققلارينا وحشيجه سينه حؤرمت سيزليک ائتمک داورانيشی دييشمه دی.
فارس شوونيزمی نين پروگراملاری بو دفعه ده امت چيليک آدی ايله قد علم
ائله دی. اسلامين ذاتيندا و ماهيتينده ميللتلرين حاققلارينا احترام حيسسی
اصرارلا وورغولانسادا فارس شوونيزمی نين الينده اويونجاغا دؤنوشن دينی
مقدسات دا ميللتلرين آسيميله ائديلمه سی اوچون بير وسيله اولموشدور.
آذربايجان ميللی جبهه سی، گونئی آذربايجانلا ايلگيلی اولاراق ايران آديله
مجبور حالدا بيرلشمگه اينامی يوخدور، بلکه آذربايجان ميللتی نين تاريخی
تورپاقلاريميزدا آزاد
سئچگيلرله اؤزو- اؤز طالعينی الده ائتمگه اينانير و اوچ اساس پرنسيپی اؤزونه
رهبر ائتميشدير: 1- پارلمنت 2– اجرا حاکمييتی 3- معاصر حقوق سيستيمينه گؤره
محکمه لرين يارانماسی.
بو اوچ پرنسيپلرين منطقيندن يولا چيخاراق اؤزونه مخصوص استراتژی و مبارزه
تاکتيکاسی معين ائدن آذربايجان ميللی جبهه سی سئکولار دوشونجه طرفداری دير.
ميللتيميزين دينی احتياجلارينا سايقيلی اولماقلا، حؤرمتله ياناشماقلا بيرليکده
دينی اينانجلارين فارس شوونيزمی طرفيندن پيس نييتله آسيميلاسيون آلتی کيمی
استفاده ائديلمه سينه شدتله قارشی چيخماقداييق.
آذربايجان ميللی جبهه سی بئله حساب ائدير کی، فارس شوونيزمی نين تخريباتينی
انگلله مک اوچون ميللی ستم آلتيندا ياشايان بوتون ميللتلر بير يئرده معاصر
اولمايان و غير اينسانی سياسته قارشی مبارزه آپارماليديرلار. اورتاق
مظلومييته معروض قالديغيميز اوچون بير بيريميزی داها راحت آنلايا بيله ريک. بو
گون ايراندا ميللی ستم آلتيندا بوتون ميللی ده يرلرينی ايتيرمکده اولان
ميللتلرين بيرينجی و گرچک متتفقلری اؤزلری دير. يعنی تورک، تورکمان، عرب،
بلوچ و کورد اولاراق فارس شوونيزمينه قارشی بيرليک جبهه سی
تشکيل ائديلمه ليدير. غلبه نين تملينده ده بو بيرليک دوشونجه سينين و
دويغوسونون اورتايا قويولماسی دورماقدادير. ياشانماسی ممکون اولان و اينسانی
بير دونيانين برپا ائديلمه سی اوچون بو بيرلييه احتياج واردير.
باشاريلار آرزوسيله
آذربايجان ميللی جبهه سی
۱۹⁄۰۲⁄۲۰۰۵
لندن
 |