|
۳۱
دکابر دونيا آذربايجانليلاری نين هم ره يليک گونو مناسبتيله آذربايجان ميللی جبهه
سی نين مراجعتی
عزيز آذربايجانلی
هموطنلر!
بيلديگينيز کيمی وطنيميز آذربايجان «گلستان و ترکمانچای» آنلاشمالاری ايله
بؤلونموشدور. آذربايجان پارچالانديغی گوندن اعتبارا ميللتيميزين آيدينلاری
يوردوموزون بوتؤولشمه سی اوچون مختلف ساحه لرده بيرليک دوشونجه سينی تبليغ
ائتميشلر. آذربايجانين پارچالانما فلاکتی ماهنيلاريميزدا، باياتيلاريميزدا،
ادبياتيميزدا و فولکلوروموزدا دا اؤز عکسينی تاپميشدير. عين ديلی، طالعی، تاريخی
پايلاشان ميللتيميز ميللی کيمليگينی قورويا بيلمک اوچون دايما بيرليک ده ن سؤز
آچميشدير.
گونئی آذربايجاندا حبيب ساحر، سهند، شهريار و قوزئی آذربايجاندا صمد وورغون، علی
آقا واحد، سليمان رستم کيمی وطنداشلاريميز، بؤيوک اراده ايله بيرليک حاققيندا حسرت
ادبياتی يارادميشلار. شبهه سيز کی، بو ساحه ده بو قدر فکير اورتايا قويان بيرليک و
بيرلشمه عشقی بير شکيلده اؤز نتيجه سينی وئرمه ليدی.
سويوق ساواشين سونا چاتماسيله عين زاماندا دونيادا بير چوخ حادثه لر باش وئردی.
بيزيم ميللی منافعيميز و ميللی طالعيميز باخيميندان بو حادثه لرين ان اؤنملی سی 31
دکابر دونيا آذربايجانليلاری نين هم ره يليک گونودور.
بو گونده آذربايجانليلار، بيرلشمه اراده سينی آچيق شکيلده دونيايا اعلان
ائتميشدير. بؤيوک شهريارين،
« قاشديق اوزلشديک آراز
دا يئنه گؤزلر بولاغ
اولدو » ايفاده سی گرچکلشدی سانکی.
سر حد بويونجا يئرلشن روسيا و ايران اردوسو ميللتيميزين بيرلشمه اراده سينه قارشی
چيخا بيلمدی. وطنداشلارين سئوينجله دولو گؤز ياشلاری آراز چايی نين ساحل لرينه
توکولدو.
ميللت فلاکتلی و اوموتلو گونلری ايله بير يئرده بير آنلام ايفاده ائدر. آذربايجان
تورکلوگونون فلاکتلی گونلری نين يانی سيرا موتلو و شانلی گونلری ده
واردير. بو مقدس گونلردن بيری ده 31 دکابر دير. چونکی
۳۱
دکابر دا ميللی اراده ميز دونيانين گوجلو اردوسونا غالب
گلدی. وطنيميزين اورتاسينا سانجيلميش تيکانلی مفتيل لر
سؤکولدو، اوزون ايللر بير- بيرينه قووشماق حسرتينده ياشايان باجی-
قارداشلار گوروشدولر، اوزون ايللر کئچه جک و هر زامان ميللتيميز بو
مقدس گونو شرفله و افتخارلا خاطيرلاياجاق.
بو عزيز و مقدس گونون غروری ايچينده اولان آذربايجان ميللی جبهه سی اؤز مبارزه
سينده ميللی تاريخيميزين قيزيل صحيفه سی اولان
۳۱
دکابر دان الهام آلماقدادير.
آذربايجان ميللی جبهه سی اؤز موتلولوغونو بوتون ميللتيميزله پايلاشير و اينانير کی،
تاريخينده بيله محتشم بير گونه صاحب آذربايجانليلار بوتون اسارت زنجيرلرينی قيريب
و اؤز ميللی آماجلارينا چاتاجاقدير.
دونيانين هاراسيندا ياشاماسيندان آسيلی اولماياراق بو سئوگی و سئوينج دولو ميللی
بيرليک گونوموز مناسبتيله بوتون آذربايجانلی وطنداشلاريميزی تبريک ائدير، اونلارا
جان ساغليغی و يوکسک باشاريلار آرزولاييريق.
آذربايجان ميللی جبهه سی
۳۱⁄۱۲⁄۲۰۰۴
ايسوچ-مالمو
 |
