آذربايجان ميللي جبهه سينين نوروز بايرامي مناسبت ايله آذربايجان خالقينا تبريکي!

عزيز هموطنلر، غيرتلي باجي و قارداشلاريميز!
مين ايللر بويو دده بابالاريميز باهارين گليشيني مين آرزو و ايستکله بايرام ائتميش، پيسليکلری، آغری و آجيلاريني سو اوزرينده آخيتميش، اوددا يانديرميش، گوزل نييتلرين بير بوغدا دنسينده، سمني دييرک بسلميشدی. مين ايللردير مغلوبيتين آجيسي، غلبه نين سوينجلري بيزلری ايز لميش، بو گونوموزه قدر ياشادميشدير. بايرام تونقاليندا، ميسری، کوراوغلو هاواسيندا، بابک، جاويدان يادداشي ايله شهيد قاني ايله يويولوب آرينديق. بيزلری خائن لر، ساتقينلار، جلادلار سينديرا بيلمدی. ستارخان، خياباني، پيشه وری و بوتون شهيدلريميزين روحو بيزيملدير. بو عزيز بايرام گونونده قهرمان لاريميز يئلرين قوجاغيندا، اودون ايستيسينده، سويون شفافليغيندا تورپاغين عظمتيندير.

عزيزلريميز! هامينيزی، هاميميزی، قونداغداکي آنا لايلاسي، چيچک سود قوخولو بالالاريميزی، آغ بيرچک و آغ ساققالاريميزی، باجي و قارداشلاريميزی نوروز مناسيبت ايله اورکدن تبريک ائدير، سيزه اوغورلار آرزولاييريق. اوجا تونقالاريميز گور يانسين، سولارينيز بول آخسين، هاوانيز تميز، تورپاغينيز برکتلي اولسون.

آذربايجان ميللي جبهه سي
۲۱⁄۰۳⁄۲۰۰۳
ايسوچ - مالمو