|
دولت و آذربايجان نماينده لري آراسيندا موافقت اولونموش قراردادين متني دولت و آذربايجان نماينده لري آراسيندا اولان مذاکراتين تعقيبينده و دولتين ارديبهشت آينين ايکي سي ۱۳۲۵ ايل تاريخلي، ٧ ماده دن عبارت و همين نماينده لر طرفيندن قبول ائديلميش ابلاغيه ني نظره آلماق و تبادل افکار نتيجه سينده توافق نظر حاصل اولدو کي، آشاغيداکي ماده لر توضيح و مکمل عنوان ايله تنظيم اولونوب و اجرايه قويولسون׃ ماده ۱) دولت ابلاغيه سينين۱- جي ماده سي باره سينده موافقت حاصل اولدو کي، بو جمله اونا آرتيريلسين: ماليه رئيسي ده ايالتي انجمنين پيشنهادي و دولتين تصويبي ايله تعيين اولاجاقدير۰ ماده ۲) چون دولت ابلاغيه سينين۲- جي ماده سينده مقرر اولموشدور استاندار، انجمن ايالتينين نظريني جلب ائتمک شرطيله، دولت طرفيندن تعيين اولاجاقدير، بو اصلين اجراسي اوچون موافقت حاصل اولدو کي، وزارت کشور، استانداري ايالتي انجمنين پيشنهاد ائتديگي نئچه نفرين آراسيندان انتخاب ائديب و تصويب اوچون دولته پيشنهاد ائتسين۰ ماده ۳) آذربايجاندا اولان آخر تحولاتي نظره آلاراق، دولت اينديکي مجلس ميلليني ايالتي انجمن منزله سينده تانياجاقدير. ۱۵- جي مجلس تشکيل تاپيب دولت طرفيندن پيشنهاد اولونان يئني ايالتي و ولايتي انجمن قانونو تصويب ائديلديکدن سونرا، آذربايجان ايالتي انجمنينين انتخابي، تصويب اولموش قانون اوزره تئزليکله باشلاناجاقدير۰ ماده ۴) آذربايجان تحولو و نهضتي نتيجه سينده نظام وظيفه افراديندان احضار اولونان قوشون، بو قراردادين امضاسيله ايران ارتشي جزوينده اولور و بو قوشون و فرمانده لرينين تکليفيني تعيين ائتمکدن اوتري موافقت حاصل اولدو جناب آقاي قوام السلطنه دولتي و آذربايجان ايالتي انجمني نماينده لـريندن عبارت بيـر کميسيون تشـکيل تاپيب و بو کـميسيون مسئـله ني حل ائتـمک يولـونو تـئزليکله تصـويب اولمـاقـدان اوتـري، پيشنـهاد ائـتسين۰ ماده ۵) موافقت حاصل اولدو کي، آذربايجان عوايديندن يوزده ٧۵ فايضي محلي مخارج اوچون اختصاص وئريليب و يوزده ۲۵ فايضي ده ايران مملکتينين عموم مخارجي اوچون مرکزه گونده ريلسين۰ تبصره ۱) پست و تلگراف، گمرک و دمير يول و اروميه درياچه سينين کشتيرانليق مخارجي و عوايدي کلا دولت عهده سينه و دولته منحصر اولاجاقدير و ضمنا قيد ائديلير کي، ايالتي و ولايتي انجمنلر و دولتي دوايرين تلگرافي مجانا مخابره اولوناجاقدير۰ تبصره ۲) اساسي شوسه يوللارينين ساختماني و تعميري دولتين و فرعي، محلي يوللارين احداثي و تعميري ايسه ايالتي انجمنين عهده سينه اولور۰ تبصره ۳) آذربايجان اهاليسينين ايران مشروطيتينه ائتديگي بويوک خدمتلري و آذربايجانين غيور خالقينين آزادليق و دموکراسي قورماق يولوندا فداکارليغيندان قدردانليق و حق شناسليق ائتمکدن اوتري دولت قبول ائدير کي، آذربايجانين گمـرکي عايداتينين يوزده ۲۵ فايضي آذربايجان دارالفونونو (دانشگاه) مصارفيني تامين ائتمکدن اوتري اختصاص وئريلسين۰ ماده ۶) دولت قبول ائدير کي، ميانه ايله تبريز آراسينداکي دمير يول خطينين چکيلمه سينه تئزليکله باشلاييب و سرعتـله انجام وئرسين. معلوم دور کي بو ايشده آذربايجان کارگرلري و متخصصلري مقدم توتولاجاقلار۰ ماده ۷) نظام وظيفه دن باشقا «فدايي» آديله تشکيل تاپان داوطلب قوشونلار ژاندارمرييه تبديل اولونورلار و بو انتظامي قوه لرين تکليفيني تعيين ائتمک و همچنين اونون فرمانده لرينين تعييني اوچون موافقت حاصل اولدو کي، جناب آقاي قوام السلطنه دولتي و آذربايجان ايالتي انجمني نماينده لريندن عبارت بير کميسيون محلده تشکيل تاپيب و تئزليکله بو مسئله ني حل ائتمک يولونو تصويبدن اوتري پيشنهاد ائتسين۰ تبصره ۱) چون آخر ايللرده بعضي نامناسب عمللر نتيجه سينده امنيه و ژاندارمري آدي ايران عمومي افکاري مقابلينده، خصوصيله آذربايجاندا مخالف و نامناسب احساسات توليد ائديبدير و چون آخر وقتلرده دولت رئيسي شخصا بو تشکيلاتين فرمانده ليگيني عهده سينه آليب و بو اداره اصلاحات و ناصالح عنصرلردن تصفيه انتظاري گئدير. بونا گوره موافقت اولوندو کي ژاندارمرييه نسبت عمومي احساسات، خصوصيله آذربايجان اهاليسينين احساساتي دولت رئيسينه يئتيريلسين تا بو تشکيلاتين آديني ده ايشمک و اونون اوچون مناسب بير آد انتخاب ائتمکدن اوتري لازمي قرارلار آلسينلار۰ ماده ۸) آذربايجان دموکرات نهضتينين نتيجه سينده کندچيلر آراسيندا بولونن تورپاقلارين خصوصوندا، او قسمت کي دولتي خالصجاتا مربوطدور، دولت بوتون مملکتده اولان خالصه تورپاقلاري کندچيلر آراسيندا بولونمه سيله اصولا موافق اولدوغو اوچون بو ايشين اجراسيني مانع سيز بيلير و بو مسئله يه مربوط اولان لايحه ني، بيرنجي فرصتده تصويب اولماقدان اوتري مجلس شوراي ميللي يه پيشنهاد ائده جکدير. آذربايجانين اخير تحولاتي نتيجه سينده کندچيلر آراسيندا بولونن باشقا تورپاقلارين باره سينده موافقت حاصل اولدو کي، مالکلرين خسارتلرين جبران ائتمک و يا اونلارين املاکينين تعويضيندن اوتري جناب آقاي قوام السلطنه دولتي و آذربايجان ايالتي انجمني نماينده لريندن عبارت بير کميسيون تشکيل تاپيب و بو کميسيون مسئله نين راه حليني تصويبدن اوتري پيشنهاد ائتسين۰ ماده ۹) دولت موافقت ائدير کي، ۱۵- جي مجلس آچيلان کيمي آزادليق و دموکراسي اصولو اوزره، يعني عمومي، گيزلي، مستقيم، متناسب، برابر و قادينلاردا شامل اولماق شرطيله تنظيم اولونان انتخابات قانونو لايحه سيني مجلسه تقديم ائديب و اونون تصويبيني فوريتله ايسته سين و همچنين دولت قبول ائدير آذربايجان و اولکه نين باشقا نقطه لري نماينده لرينين سايني، اهالي سينين تناسبيله آرتيرماقدان اوتري ۱۵- جي مجلس آچيلان گونو قانوني لايحه ني پيشنهاد ائديب ايکي فوريتله اونون تصويبيني ايسته سين تا تصويبدن سونرا، انتخاب وسيله سيله همان نقطه لرين نماينده لرينين کسريني تعيين و مجلسه گوندرسينلر۰ ماده ۱۰) آذربايجان ايالتي ۳ و ٤- جو استانلاردان عبارت اولاجاقدير۰ ماده ۱۱) دولت موافقت ائدير کي، آذربايجان ايشلرينين ياخشي قاباغا گئتمه سي اوچون استاندار اداره رئيسلري و ايالتي انجمنين هيات رئيسه سيندن عبارت بير اداري شورا دوزلسين و بو شورا ايالتي انجمنينين نظارتي آلتيندا وظيفه سيني انجام وئرسين۰ ماده ۱۲) ايکي ارديبهشت ۱۳۲۵ تاريخلي دولت ابلاغيه سينين ۳- جو ماده سينه، متوسطه و عالي مدرسه لرين تکليفي ني تعيين ائتمک لحاظيندان مبهم اولدوغو اوچون، بو جمله اضافه اولونور: متوسطه و عالي مدرسه لرده تدريس آذربايجان و فارس ديللرينده، وزارت فرهنگ طرفيندن اولونان اصلاح، زمان و مکان شرايطي و دموکراتيک اصولـلارلا موافق و اويغون بير صورتده تنظيم اولونان پراگرام اوزره عميللي اولاجاقدير۰ ماده ۱۳) دولت موافقت ائدير کي آذربايجاندا اولان کوردلرده بو موافقتنامه نين مزاياسيندان استفاده ائديب و دولت ابلاغيه سينين ۳- جو ماده سي اوزره ۵- جي ابتدايي کلاسينا قدر اوز ديللرينده تدريس ائتسينلر۰ تبصره - آذربايجاندا اولان آسوري کيمي اقليتلرينده حقلري اولاجاقدير کي۵- جي کلاسا قدر اوز آنا ديللرينده تدريس ائتسينلر۰ ماده ۱۴) دولت نظرده توتوبدور کي، بوتون ايران اوچون دموکراسي اصولو اوزره، يعني عمومي و گيزلي، مستقيم و متساوي راي ايله تنظيم اولونان شهر انجمنلري قانونو تصويب اولماقدان اوتري، ۱۵- جي مجلسه پيشنهاد ائتسين. بو قانون تصويب اولان کيمي، آذربايجان و بوتون ايران نقطه لرينده شهر انجمنلرينين سئچکيسينه باشلاناجاقدير. بو قانون تصويب اولونادک و تازه سئچکيلر انجام تاپانا قدر آذربايجاندا اولان اينديکي شهر انجمنلري اوز وظيفه لرينه ادامه وئره جکلر۰ ماده ۱۵) بو موافقت نامه ايکي نسخه ده تنظيم و مبادله اولوب، دولت هياتي و آذربايجان ايالتي انجمنينين تصويبيندن سونرا اجرايه قويولور۰
تبريز شهري ۲۳ خرداد ۱۳۲۵ ايل پيشه وري مظفر فيروز
|
