|
آذربايجان ميللي حکومتينين ديل حاقدا قراري خالقيميزي دولت دستگاهينا ياخينلاشديرماق و عمومون احتياجاتيني ساده بير صورتده آنلاماق و همچنين ميللي ديلي و ميللي مدنيتيميزين ترقي و تکامل يوللاريني تميزله مک اوچون آذربايجان ميللي حکومتي اوزونون ۱۶ دي (۱۳۲٤) تاريخلي جلسه سينده آشاغيداکي قرارلاري قبول ائتميشدير؛ ۱) بوگوندن اعتباراً آذربايجاندا، آذربايجان ديلي رسمي دولت ديلي حساب اولونور. دولتين قرارلاري و رسمي اعلانلار، همچنين خالق قوشونلاري حصه لرينه وئريلن فرمانلار و قانون لايحه لري مطلقاً آذربايجان ديلينده يازيلماليدير٠ ۲) بوتون اداره لر (دولتي، ميللي، تجاري و اجتماعي) اوز ايشلريني آذربايجان ديلينده يازماغا مجبوردورلار. بو ديلده يازيلمايان دفتر و مدارک رسمي حساب اولونماياجاقدير٠ ۳) محکمه لرده ايشلرين جرياني تمامي ايله آذربايجان ديلينده آپاريلمالي و بو ديلي بيلمه ينلر اوچون مترجم تعيين اولونماليدير٠ ۴) آذربايجانين بوتون اداره، موسسه و تجارتخانالارين تابلولاري مطلقاً آذربايجان ديلينده يازيلماليدير٠ ۵) رسمي اجلاسلار و يغينجاقلار، سخنرانليق و مذاکره آذربايجان ديلينده اولماليدير٠ ۶) آذربايجانلي اولماييب باشقا ديل ايله دانيشانلار و عمومي دولتي اداره لرده خدمت ائدنلر آذربايجان ديلينده يازيب - اوخوماغي و دانيشماغي اورگنمه ليديرلر٠ ۷) معارف وزارتي اداره مامورلاريني آذربايجان ديلي ايله آشنا ائتمک مقصدي ايله آيري ديللردن سوايي، اونلار اوچون اداره لرين نزدينده بويوکلر اوچون مخصوص کلاسلار آچماليدير. بو کلاسلاردا حاضر اولانلارين ايش مدتي بير ساعت آزالماليدير٠ ۸) آذربايجاندا ياشايان باشقا ملتلر اوز ايشلريني اوز آنا ديللرينده آپارماغا حاقليديرلار. لاکين اونلار اوز رسمي اعلانلاري و يازيلاريندا اوز ميللي ديللري ايله برابر آذربايجان ديليني، رسمي دولتي ديل اولاراق، ايشلتمه ليديرلر٠ ۹) آذربايجاندا ياشايان خيردا ملتلر خصوصي ميللي مکتبلرينده کي تعليم اوز آنا ديللرينده اولدوغو حالدا، آذربايجان ديلينينده تدريسي مجبوريدير٠ ۱۰) آذربايجان ميللي حکومتي معارف وزيرينين مکتبلرده درسلرين آذربايجان ديلينده اولماسي حاقيندا کي قراريني تصويب و تاييد ائديب، مدرسه لرين ميللي ديله کئچمه سيني بوتون معلم و معلمه لره بير ميللي وظيفه کيمي تاپشيرير٠ آذربايجان ميللي دولتينين باش وزيري، پيشه وري
|
