|
آذربايجان ميللي حکومتينين برنامه سي آذربايجان ميللي کابينه سي، آذربايجان خالقينين ايللر بويو آرزو ائتدييي ميللي مختاريتيني عملاً وجودا گه تيرمک و بو واسطه ايله آذربايجان خالقينين ميللي احتياجلاريني رفع ائديب، اونو مترقي و تکامله سوق ائتمک اوچون آشاغيداکي وظايفي اوزونون ياخين هدفي و برنامه سي قرار وئرير؛ ه۱) ميللي مختاريتيميزي دونيايا تانيتماق، اونون داوام و بقاسيني تامين ائتمک اوچون جدي تدبيرلر گوروب، صلاحيتدار مقامات ايله مذاکره يه گيريشمک، ايرانين استقلال و تماميتيني خلل دار ائتمه دن ميللي دولتيميزي دموکـراتيک اساسلار اوزره قـورماق و بو يولـدا قاباغا چيخابيـلن مشکـلاتي رفع ائتمـک٠ ه۲) ميللي مختاريتيميزي محکم اساسلار اوزره قوروب، اونو خالقا ياخينلاشديرماق مقصدي ايله چوخ تئز بير صورتده ولايت انجمنلرينين انتخاباتينا باشلاماق و يئرلي اداره لرين نظارتيني اونلارين اختيارينا قويماق٠ ه۳) شهرلريميزين عمران و آبادليغي اوچون بلاتاخير شهر انجمنلريني، دموکراتيک اساسلار اوزره انتخاب ائديب، اونلارين ايشلريني دوزگون و صحيح بير صورتده جريانا سالماق٠ ه۴) يئرلرده معتمد آزاديخواه آداملاردان، فرماندار و بخشدارلار انتخاب ائديب، اونلارين واسطه سي ايله کئچميش ظالمانه حرکتلر و خالقي تحقير ائديجي عمللرين قاباغيني آليب، بوتون اولکه ده امنيت و آسايشي تامين ائتمک٠ ه۵) ژاندارم و پليس اداره لريني خائن و خالقي ازيب فلاکته سوق ائدن اشخاصين اليندن چيخاريب، آزاديخواه و ميهن پرست اشخاصا تاپشيرماق و اونلارين ايشلريني خالقين آرزو و احتياجاتينا متناسب بير حالا سالماق٠ ه۶) ماليات قانونلاريني نظردن کئچيرمک و ماليه اداره سينين دخل و خرجيني تفتيش ائتديکدن سونرا، چوخ تئز بير صورتده ميللي بودجه لايحه سيني ميللي مجلسه تقديم ائتمک. عموميتله مالي سياستين گه لير و مخارج اساسيني مملکتين ترقي و تکاميللي اوزرينده قرارلاشديرماق٠ ه۷) مختاريتيميزي، ميللي مجلسيميزي و ميللي دولتيميزي قورماق و اونون گه له جه يني تامين ائتمک اوچون کندلرده و شهرلرده وجوده گلن فدايي دسته لريني بير مرکز اطرافيندا تمرکز وئرمک، ميللي خالق قوشونو وجودا گه تيرمک و بو قوشونون تسليحات و تنظيماتيني معاصر حالا سالماق مقصدي ايله جدي تدبيرلر گورمک٠ ه۸) فرهنگ و معارف ساحه سينده دولتيميزين قاباغيندا ايکي بويوک مسئله دورور. بيرنجيسي اوز ميللي ديليميزي بوتون مدرسه لرده رسمي اولاراق قبول و اجرا ائتمک، ايکينجيسي ايسه عموميتله سوادسيزليغا قارشي مبارزه آپارماق، مجاني و اجباري تحصيلي عميللي يولونا قويماق. بونلارين هاميسيندان چوخ، ميللي حکومتيميزين عالي تحصيل مسئله سينه اهميت وئريب، ميللي دارالفنونوموزون (دانشگاه) اساسيني قورماغا چاليشماليدير٠ ه۹) تجارت و اقتصاد ساحه سينده ميللي حکومتيميز بيرينجي نوبه ده ميللي صنايع ميزه اهميت وئريب، موجود کارخانالاري دوزگون يولونا قوياجاق. ايکينجي نوبه ده يئني کارخانالار آچماقلا، مملکتين صنايعينه اولان احتياجاتيني تامين ائده جکدير. تجارت ساحه سينده دولتيميز آذربايجانين تجارت مرکزي اولا بيلمه سي اوچون تدبيرلر گوره جک و يوللار آراياجاقدير٠ ۱۰) يوللارين تعمير و احداثي، پست و تلگراف و تلفن کيمي ارتباط وسايطينين گئنيشلنديريب، معاصر حالا سالينماسي حکومتيميزين اساسي وظيفه لريندن دير٠ ۱۱) کندلي ايله اربابلار آراسيندا توليد اولان اختلافاتي رفع ائتمک اوچون متقابل رضايت شرطي ايله، جدي قانون لايحه سي تنظيم ائديب، بو يولي ايله کندلي و ارباب مسئله سيني حل و تصويب ائله مک٠ ۱۲) کندلرده و شهرلرده گوندن - گونه آرتماقدا اولان ايشسيزليغين قارشيسيني آلماق اوچون خالصه تورپاقلاريني فوريتله زارع لر آراسيندا تقسيم ائتمک. همچنين آذربايجاني ترک ائديب اونون خارجينده ميللي مختاريتيميز عليه نه تبليغات آپارانلاريندا يئرلريني ضبط ائديب کندليلرين اختيارينا قويماق ايله يئرسيز کندليلر آياقلانديريلماليدير. بوندان علاوه خالقيميزين اکثريتيني تشکيل ائدن کندليلر اولدوغو اوچون گه له جکده بانک کشاورزيني ائله بير صورتده قووتلنديرمک لازمدير کي، ايلييه بيلسين کندلييه اعتبار وئرمکله يئر مسئله سيني حل ائتسين و اربابلار اوز ميل و رغبتلري ايله يئرلري کندليلره عادلانه قيمته ساتا بيلسينلر٠ ۱۳) ايشسيزليکله جدي مبارزه ائتمک اوچون جدي تدبيرلر گورمک، ال صنايعي، يول ايشلري، کارخانالار تاسيسي، فلاحت و تجارتين آرتماسي وسيله لريندن جدي صورتده استفاده ائتمه يي لازم گورور٠ ۱۴) کارگر و زحمتکشين معيشتيني دوزگون يولا قويماق اوچون ايش و زحمت قانونو لايحه سيني تهيه ائديب مجلسه تقديم ائتمه لي و عين زاماندا ايشچيلرين بيمه ائديلمه سيني اجباري ائتمک اوچون تدبيرلر گورمه ليدير٠ ۱۵) صحييه ايشينه توجه ائديب بيرينجي نوبه ده عمومي و مسري خسته ليکلرين قاباغينين آلينماسي و مخصوصا کندلرده و آشاغي طبقه يه حکيم و داوا يئتيرملکه خالقين بهداشتيني تامين ائتمه ليدير٠ ۱۶) ميللي شورا مجلسي طرفيندن بو آنا قدر وضع اولونموش قانونلاري، آذربايجان خالقينين حياتينا و ميللي مختاريتينه مناسب بير صورتده اصلاح ائديب ته زه مفيد لايحه لر پيشنهاد ائتمک٠۱۷) خصوصي مالکيت حاقيندا آذربايجان ميللي حکومتي، مملکتين بوتون ساحه لري اوچون خصوصي مالکيتي قبول ائديب، مملکتين و خالق اقتصادياتينين ترقي سينه و خالقين رفاه حالينا سبب اولان هر جور خصوصي اقداماتا کومک ائده جکدير٠ ۱۸) آذربايجان ميللي حکومتي، اولکه ده ياشايان عموم اهالينين وجدان و عقيده آزادليغينا احترام ائده جکدير٠ ۱۹) آذربايجان ميللي حکومتي، آذربايجانليلارلا بيرليکده آذربايجاندا ياشايان بوتون هموطنلري خصوصي ايله کوردلر و باشقالاريني حقوق و قانون مقابلينده مساوي حساب ائدير٠ ۲۰) آذربايجان ميللي حکومتي، مرکزي ايران حاکميتيني تانيماقلا برابر بو حکومتين آذربايجانين مختاريتينه مخالف گلمه ين، آذربايجان خالقينين موسئسان مجلسي و آذربايجان مجلسينين مراجعتنامه و قرارلاريندان قيد اولونان ميللي حقوق طلبلرينه ضد اولمايان تدبيرلرين حياتا کئچيره جک دير٠ برنامه نين اطرافيندا مفصل صورتده بحث ائديکدن سونرا راي آلينيب، آذربايجان ميللي حکومتينين برنامه سي اتفاق آراء ايله تصويب اولدو٠
|
