|
آذربايجان ميللي حکومتينين اعلاميه سي آذربايجان ميللي مجليسينين انتخاب ائتدييي آذربايجان ميللي دولتي ايرانين استقلال و تماميتيني حفظ ائتمکله برابر، ايشه باشلاديغيني بو واسطه ايله بوتون خالقا اعلام ائدير؛ بو اعلاميه منتشر اولان گوندن (۲۱ آذر۱۳۲۴ ) اعتباراً، مالکيت خصوصي محفوظ اولماق شرطي ايله بوتون آذربايجاندا اولان دولت اداره لري ته زه حاکميتين تحت اختيارينا کئچدييندن، عموم دولت مامورلارينا اوز وظيفه لريني دوزگونلوک و صداقتله انجام وئرمه لري تاپشيريلير٠ ته زه دولتين امرلرينه اطاعت ائديب، اونون دستوري ايله رفتار ائدن کارمندلر اوچون مناسب ايش شرايطي وجودا گه تيريله جک، ايشله مکدن امتناع ائده نلر ايسه کمال احترام ايله ايسته ديکلري يئره گوندريله جکلر٠ آذربايجان ميللي حکومتي خالقين سعادت و خوشبخت لييندن اوتري قورولدوغو اوچون، عموم خالقي فعاليته، دوزلويه، آسايش و امنيتي حفظ ائتمه يه، بير- بيري ايله قـارداشواري ياشـاماغا دعـوت ائدير٠ امينتي اخلال ائدن و خالقين مال، جان، ناموس و حيثيتينه تجاوز ائله ينلر، همچنين دولت مالينا خيانت الي اوزاديب دولت اداره لريندن سوء استفاده ائدنلر و يا دولت اداره لرينده خرابکارليق، مسامحه و اوز وظيفه سينده کوتاهليق ائتمک کيمي خائنانه تشبثلر بروزه وئرنلر ايسه خالقين دشمني حساب اولونوب، ملت و دولت يانيندا نفرت و انزجار قازانماقدان علاوه، قانوني محکمه واسطه سي ايله مجازات ائديله جکلر٠ هاميدان خالقا و اولکه يه خدمت و آذربايجانين گه له جه يي يولوندا جديت گوزله نير. دولت ايسه اونون شرايطيني وجودا گتيرمه يه چاليشاجاقدير٠ آذربايجان ميللي وزيرلر هيأتي عين زاماندا آذربايجاندا ماموريتلري اولان خارجي دولتلرين ديپلوماسي نماينده لرينه اطلاع وئرير کي، کما في السابق اونلارين بين الملل قانونلار شرايطينده اولان حق و اختيارلاري کمال دقت و احترام ايله مراعات اولوناجاقدير. همچنين دموکراتيک دولتلرين اتباع اينين آسايش و امنيتيني حفظ ائتمک يولوندا ميللي دولت هئچ بير فداکارليقدان خوددارليق ائتمه يه جکدير. بوگوندن اعتباراً دولته متعلق اولان منقول، غير منقول اموال، همچنين نقد و جنس و اعتبار ميللي، دولت اختيارينا کئچدييندن، اونلارين ساخلاماغينا موظف اولان دولت مامورلاري، کئچميشده وئرديکلري تعهد و قبول ائتديکلري مسئوليت اوزره، اونلاري حفظ و حراست ائتمه يه مجبوردورلار. بو اموالي حيف و ميل ائدنلر آغير جزالارلا مجازات گوره جکلر٠ آرتيق آذربايجان ميللي حکومتي تحقق تاپميش، خالقين اراده سي ايله داخلي ميللي دولتيميز وجودا گه ليب، رسمي صورتده خالقيميزين آرزو و آماليني اجرا ائتمه يه باشلاميشدير. خالق ايسه اوز ميللي حکومتينه، وار قوه سي ايله مساعدت گوستريب اونون فعاليتي اوچون مناسب شرايط وجودا گه تيرمه ليدير٠ يوخاريدا قيد ائديلدييي کيمي دولت وار قوه سي ايله امنيتي حفظ ائتمه يه چاليشير. اونا گوره خالق اوچون نگران اولماغا هئچ بير دليل يوخدور. هر کس اوز ايشينه مشغول اولمالي، اوز ايسته دييي کيمي ياشاماليدير. بازار باغلاماق، مدرسه لري تعطيل ائديب، وحشت و اضطراب ياراتماغين معناسي يوخدور. حکومت اوز برنامه سيني خالقين احتياجاتي اوزه رينده قورموشدور. اونا گوره خالقي ناراحت ائدن حادثه لره يول وئرمييه جکدير. تصادفي حادثه لره ايسه چوخ تئز بير زاماندا خاتمه وئريله جک. ماجراجولار، آسايشي اخلال ائدنلر صالح محکمه طرفيندن محاکمه و شديد بير صورتده مجازات اولوناجاقلار. هئچ بير پيس اتفاق دوشميه جکدير. هئچ کسين حقوقونا تعرض اولمياجاقدير. ميللي حکومت نظمييه اداره سيني ته زه قوه لر، وسيع اختيارات ايله گوجلنديرميشدير. هرج و مرج و ناامنلييه آرتيق ميدان وئريلمييه جکدير. مخصوصاً مدرسه لريميز همان سابق پروگراملاريني تعقيب ائتمه لي محصللريميز وار قوه لري ايله امتحانلارا حاضرلاشماليديرلار٠ کندلرده و شهرستانلاردا ايسه جدي صورتده ايشه باشلانيب عادي حال وجودا گه له جک و دولت مامورلاري، فدايي لرين و يا غير مسئول اشخاصين دخالتي اولمادان اوز وظيفه لريني انجام وئرمه يه قادر اولاجاقلار. فدايي دسته لري انتظام آلتينا آلينيب معين مرکزه تابع اولاجاق، بو واسطه ايله هر بير سوء حادثه احتمالينين قاباغي آليناجاقدير٠ گئدين چاليشين، آسوده اولون ملتيميزين گه له جه يي و سعادتيني تامين ائتمک اوچون قبول ائتدييميز وظيفه ني صداقت و ايمانلا انجام وئرين. دولت عموم هموطنلردن بونو طلب ائدير٠
|
