|
آذربايجان ميللي مجلس موسسلرينين قرارلاري سه شنبه گونو، آبان آيينين ۲٩- دا (۱۳۲٤- جي ايل) آذربايجان خالقينين بويوک ميللي کنگره سي، آقاي پيشه وري نين عمومي اوضاع حاقيندا وئردييي معلوماتي مذاکره ائتديکدن سونرا آشاغيداکي قرارلاري اتفاق آراء ايله قبول ائدير؛ ۱) بويوک دموکراتيک ملتلرين فداکارليغي نتيجه سينده ديکتاتورلوق، زورگولوق و نژاد اوستونلويو تبليغ ائدن قوه لرين ابدي اولاراق يئنيلدييي و بوتون ملتلره اوزنو اداره ائتمک، اوز مقدراتينا حاکم اولماق امکاني وجودا گلدييي حالدا، آذربايجان خالقي تمام معناسي ايله بير ملت کيمي آياغا قالخيب اوز طبيعي و قانوني حاقينا، اوز گوجو ايله مالک اولماق ايسته يير٠ ۲) خالقيميز سوء تفاهم و تهمتلره يول وئرمه مک اوچون اوز مقدراتيني اله آلديغي حالدا، اولکه ميزين ايراندان آيريلماماغي ني اعلان ائدير و بوتون ايران خالقلاري ايله قارداشليغيني حفظ ائتمه يي اوزونه وظيفه بيلير٠ ۳) ميللي کنگره آزادليق دشمنلرينين افترا و تهمتلرينين اينديدن قاباغيني آلماق اوچون آچيق و آيدين صورتده آذربايجانين ايراندان آيريلماسي و يا اونون آيري مملکته الحاق انتشاراتيني جدي صورتده تکذيب ائدير٠۴) آذربايجان خالقي مشروطه اصولونا صادق قاليب، قانون اساسينين دموکراتيک اصل لريني اجرا ائتمه يه چاليشاجاقدير٠۵) عمومي مشروطه قانونلاريني مراعات ائتمکله برابر آذربايجان خالقي اوزونون داخلي ايشلريني اداره و ميللي مختاريتيني تامين ائتمک اوچون قانون اساسيدان استفاده ائديب، انجمن ايالتي تشکيلاتيني بير قدر گئنيشلنديريب، اونا ميللي مجلس آدي وئرير. ايران داخلينده ايرانين تماميت و استقلاليني هئچ وجه له خلل دار ائتمه دن، اوزونون ميللي حکومتيني وجودا گه تيرير٠۶) بويوک خالق ميتينگلرينين قرارينا گوره خالق کنگره سي آذربايجـان دموکـرات فـرقـه سينين رهبرلييي ايله، ميللي مجلس و ولايت انجمنلري و ميللي شورا مجلس انتخاباتينين فوريتله باشلانماسيني قرارا آلير٠۷) هر بير ملت اوز مقدراتينا حاکم اولماسي او وقت امکانپذير اولا بيلر کي، او ملت ياشاديغي اولکه ني اداره ائتمک اوچون اساسي قانونلارا مالک اولا بيلسين. بيز چوخ ياخشي بيليريک کي، تهراندا تمرکز تاپميش مرتجعلر خالقيميزا بو اختياري وئرميه جکلر. بلکي اوزلرينين خائن اراده لريني خالقا و مملکته تحميل ائتمک اوچون بيزيم قاباغيميزا انگل لرده چيخارتماقدان گوز يومماق ايسته مه يه جکلر. اونا گوره بويوک کنگره خالقيميمزين آرزو و طلباتيني عميللي ائتمک اوچون جدي قدم گوتوروب، اوزونو مجلس موسئسلري اعلان ائدير. ميللي مختاريتيميزي محکم پايه اوستونده قورماق اوچون ميللي مجلس وجوده گه تيريير٠۸) طبيعي ديرکي سياسي، ميللي، اقتصادي و مدني مختارييته مالک اولمادان ميللي مختاريت بوش سوزدن عبارت اولوب، قالار. بو نقطه نظردن ميللي مجلس موسسلري بير حکومت ياراتماسيني و مستقيماً داخلي ايشلريميزين بو حکومت واسطه سي ايله اداره ائديلمه سيني تاخيرسيز بير صورتده لازم گورور٠۹) ميللي مجلس انتخاباتي قورتاريب، ميللي حکومت رسميت تاپان گونه دک، کنگره اوز نماينده لريندن ۳٩ نفرليک ميللي هيات آدي ايله بير هيات انتخاب ائدير و قبول ائتدييي قرارلارين اجراسيني بو موقتي هيأته تاپشيريير٠۱۰) بو هيأت ميللي مجلس تشکيل تاپان گونه قدر آذربايجان خالقينين ميللي ايشلريني اداره ائده جک، ميللي مجلس تشکيل اولان کيمي اونون وظيفه سي خاتمه تاپميش اولاجاقدير٠۱۱) مرکزده و شهرستانلاردا باشلانان انتخاباتي تامين ائتمک و ميللي هيأتين امنيتيني حفظ ائتمک اوچون ميللي کنگره يه هر نوع تدبير گورمه يه گئنيش اختيار وئريلير٠۱۲) ميللي کنگره، دولت اداره لرينين باشيندا دووران مامورلاردان ميللي هيأته تابع اولوب، اونون گوستريشلرينه و نظارتينه اطاعت ائتمه يي طلب ائدير و بونون خلافينا رفتار ائديب، اوزونو حاکم مطلق گوسترمک ايسته ين لرين تئزليکله دولت اداره لريندن اخراجيني لازم گورور٠۱۳) ميللي کنگره بوتون دولتي مدرسه لرده آذربايجان ديلينين، مجبوري صورتده تدريس ائديلمه سيني ميللي هيأته تاپشيرير و بو ميللي وظيفه ني انجام وئرمه يه مانع اولانلاري آذربايجان خالقينين دشمني حساب ائديب، اونلارين ارتجاعي فکر و خائنانه حرکتلرينه مانع اولماق اوچون، جدي تدبيرلر گورسون٠۱۴) کنگره پليس، ژاندارم و ارتش تشکيلاتينين ترکيبيني پوزماق فکرينده دييلدير. اونلار اوز رسمي لباس و درجه لريني حفظ و وظيفه لريني انجام وئرمکده داوام ائديرلر. لاکين اگر اونلاري اداره ائدنلردن، بيزيم ميللي مختاريتيميزين عليه نه بير ايش باش وئرسه، ميللي هيأته اختيار وئريلير کي، اونلارين خيانتلرينين قاباغيني آلماق اوچون جدي تدبيرلر گورسون٠
|
