|
اون ايکي شهريور بيانيه سي اصل ۱) ايرانين استقلال و تماميتيني ساخلاماقلا برابر آذربايجان خالقينا داخلي آزادليق و مدني مختاريت وئريلمه ليدير کي، ائده بيلسين اوزونون فرهنگي يولوندا و آذربايجانين آبادلاشماسي و ترقي سي اوچون عموم مملکتين عادلانه قانونلاريني گوزله مکله برابر اوز سرنوشتيني تعيين ائتسين٠ اصل ۲) بو منظوري حياتا کئچيرمک اوچون چوخ تئزليکله ايالت و ولايت انجمنلريني انتخاب ائديب ايشه باشلاماليدير. بو انجمنلر فرهنگي، بهداشتي و اقتصادي ساحه سينده فعاليت گوسترمکله برابر قانون اساسي موجبينجه تمام دولت ايشچيلرينين عميللياتيني تفتيش ائديب اونلارين تغيير و تبديلينده اظهار نظر ائده جکدير٠ اصل ۳) آذربايجانين ابتدايي مکتبلرينده اوچ کلاسا قدر درسلر فقط آذربايجان ديلينده آپاريلماليدير و اوچ کلاسدان يوخاري دولت ديلي اولماق اوزره فارس ديليده آذربايجان ديلي ايله ياناشي تدريس ائديلمه ليدير. آذربايجاندا ميللي دارالفنون تشکيلي دموکـرات فرقه سينين اساس مقصدلريندن بيري دير۰ اصل ۴)آذربايجـان دموکرات فرقه سي صنايع و فابريکالارين گئنيشلنمه سينه جدي چاليشاجاق و سعي ائده جک کي، موجود فابريکالاري تکميل ائتمکله برابر ايشسيزليگي رفع ائتمک اوچون ال و ماشين صنايعيني گئنيشلنديرمک اوچون وسيله لر ياراديب تازه فابريکالار وجوده گتيرسين٠ اصل ۵)تجارتين گئنيشلنمه سيني، آذربايجان دموکرات فرقه سي چوخ لازم و جدي مسئله لردن حساب ائدير. بو گونه قدر تجارت يوللارينين باغلي قالماسي چوخلو کندليلرين، مخصوصا باغدارلارين و خرده مالکلرين ثروتلرينين اللريندن چيخماسينا و اونلارين ديلنچي حالينا دوشمه سينه سبب اولموشدور. بونون قاباغيني آلماق مقصدي ايله دموکـرات فـرقـه سي بازار تاپماق و آذربايجان امتعه لرينين خارجه چيخاريلماسي اوچون ترانزيت يوللاري آختارماق ايشينه جدي اقدام ائتمه گي و بو وسيله ايله عمومي ثروتين نقصانينين قاباغيني آلماسي نظرده توتموشدور۰ اصل۶)دموکرات فرقه سينين اساس مقصدلريندن بيرده آذربايجان شهرلرينين آبادلاشماسيدير. بو مقصودا چاتماق اوچون فـرقـه سعي ائده جک کي، چوخ تئزليکله شهر انجمنلرينين قانونو تغيير تاپيب شهر اهاليسينه مستقل بير صورتده شهرين آبادليغينا چاليشيب اونلاري آبرومند و معاصر حالا سالماق امکان وئريلسين. مخصوصا تبريز شهرينين سو ايله تامين ائديلمه سي آذربايجـان دموکرات فرقه سينين چوخ فوري جاري مسئله لريندندير٠ اصل ۷) آذربايجـان دموکـرات فـرقـه سينين موسسلري گوزل بيليرلر کي، مملکتين ثروت توليد ائدني و اقتصادي قوه سي کندليلرين قوتلي قولودور. اونا گوره بو فـرقـه ائده بيلمز کي، کندچيلر آراسيندا وجوده گلن حرکتي نظره آلماسين. بونا گوره ده فـرقـه سعي ائده جکدير کي، کندليلرين احتياجلاريني تامين ائتمک اوچون اساسلي قدملر گوتورولسون. مخصوصا کندلي ايله اربابلارين آراسيندا معين بير حدود تعيين ائتمک و بعضي اربابلار طرفيندن اختراع ائديلميش غير قانوني وئرگيلرين قاباغين آلماق دموکـرات فـرقـه سينين فوري وظيفه لريندندير. فـرقـه سعي ائده جک بو مسئله ائله بير صورتده حل ائديلسين کي، هم کندليلر راضي قالسين و همده مالکلر اوزلرينين گلجگيندن اطمينان حاصل ائديب، رغبتله کندلرينين و اوز مملکتلرينين آبادليغينا چاليشسينلار. خالصه تورپاقلاري و آذربايجاني ترک ائديب قاچان و آذربايجان خالقنين زحمتينين محصولونو تهراندا و ساير شهرلرده مصرف ائدن اربابلارين تورپاقلاري، اگر تئزليک ايله آذربايجانا مراجعت ائتمه سه لر، دموکـرات فـرقـه سينين اساسنامه سينه موافق اولاراق کندليلرين اختيارينا وئريلمه ليدير. بيز اوزلرينين عيش و نوشيندان اوتري آذربايجانين ثروتيني خارجه آپارانلاري آذربايجانلي حساب ائتميريک. اگر اونلار آذربايجانا قايتماقدان امتناع ائتسه لر، اونلار اوچون آذربايجاندا بير حاق قائل دييليک. بوندان علاوه فـرقـه چاليشاجاق کي، چوخ سهل و ساده بير صورتده آذربايجان کندليلرينين اکثريتي تورپاق و اکين آلتلري جهتدن تامين ائتسين٠ اصل ۸)دموکرات فرقه سينين مهم وظيفه لريندن بيري ده ايشسيزليک له مبارزه ائتمکدير. اينديدن بو خطر چوخ جدي بير صورتده اوزونو گوسترمکده دير. گلجکده بو سئل گوندن - گونه قوتله نه جکدير. مرکزي دولت و محلي مامورلار طرفيندن بو خصوصدا هچ بير ايش گورولمه ميشدير. اگر ايش بو منوال ايله داوام ائدرسه، آذربايجان خالقينين اکثريتي فنا بير حالا دوشمه يه محکوم دور. فـرقـه چاليشير بو خطرين قاباغيني آلماق اوچون جدي تدبيرلر گورولسون. هله ليک فابريکالارين تاسيسي، تجارتين گئنيشلنمه سي، اکينچي تشکيلاتلارين تاسيس ائديلمه سي، دمير و شوسه يوللارين چکيلمه سي کيمي تدبيرلر، ممکندور بير قدر فايدالي اولسون٠ اصل ۹)انتخابات قانونوندا آذربايجانين حقينده بويوک ظلم ائديلميشدير. دقيق اطلاعاتا گوره بو اولکه ده دورت ميليوندان يوخاري آذربايجانلي ياشاماقدادير. بو غير عادلانه قانون موجبينجه آذربايجانا مجلس شوراي ميللي ده، ۲۰ وکيل يئري وئريلميشدير. بو قطعيا متناسب بير بولگو دييلدير. آذربايجـان دموکـرات فـرقـه سي سعي ائده جک آذربايجان نفوسونا نسبت وکيل انتخاب ائتمه حاقي اولسون. بو تقريبا مجلس نماينده لرينين اوچده بيريني تشکيل ائده بيلر. آذربايجان دموکرات فرقه سي مجلس انتخاباتينين مطلقا آزاد اولماسي طرفداريدير. او، دولت ايشچيلرينين داخلي و خارجي همچنين پوللولارين قورخوتماق و آلداتماق يولو ايله انتخابات ايشينه قاريشمالارينا جدا مخالفت ائده جکدير. انتخابات گرک تمام ايراندا آن واحده باشلانيب، چوخ سريع بير صورتده قورتارسين٠ اصل ۱۰)آذربايجان دموکرات فرقه سي فاسد، مختلس و رشوه آلان شخصلر ايله کي دولت اداره لرينه سوخولموشلار، جدي مبارزه ائده جک و دولت مامورلاري آراسيندا صالح و درستکار شخصلردن قدردانليق ائده جک. مخصوصا فـرقـه چاليشاجاق اونلارين معاشلاري و زندگانليق شرايطلري ائله اصلاح اولسون کي، اونلار اوچون اوغورلوق و خيانت ائتمه گه بهانه قالماسين. اونلار ائليه بيلسينلر کي، اوزلري اوچون آبرولي حيات وجوده گتيرسينلر۰ اصل ۱۱)دموکرات فرقه سي سعي ائده جک آذربايجاندا آلينان وئرگيلرين ياريسيندان يوخاريسي آذربايجانين اوز احتياجلارينا صرف ائديلسين و غير مستقيم وئرگيلر جدي صورتده آزالسين٠ اصل ۱۲)آذربايـجان دموکرات فرقه سي بوتون دموکراتيک دولتلر، مخصوصا متفقلرله دوستلوق ساخلاماق طرفداريدير و بو دوستلوغو داوام ائتديرمک اوچون چاليشاجاق مرکزده و شهرلرده ايران ايله متفق دموکراتيک دولتلر آراسيندا دوستلوغو پوزماق ايسته ين خائن عنصرلرين اللريني اجتماعي، سياسي و دولتي ايشلردن کنار ائتسين۰ بودور دموکـرات فـرقـه سيني يارادانلارين اصل مقصدلري٠ بيز اميدواريق کي، هر بير وطن پرست آذربايجانلي ايستر آذربايجانين داخلينده و يا آذربايجاندان خارجده بو مقدس مقصده چاتماق اوچون بيزيمله همصدا و ال بير اولاجاقدير. طبيعي دير کي، انسان اول اگر اوز ائويني اصلاح ائتمه سه محله، شهر و يا مملکت اوچون ايشله يه بيلمز. بيز اول اوز ائويميز اولان آذربايجاندان باشلاييرق و اينانيريق کي، آذربايجانين اصلاح و ترقي سي ايرانين ترقي سينه سبب اولاجاقدير و وطنيميز بو واسطه ايله قولدورلارين و مرتجعلرين چنگاليندان نجات تاپاجاقدير۰ ياشاسين دموکرات آذربايجان؛ ياشاسين مستقل و آزاد ايران؛ ياشاسين ايران و آذربايجان آزادليغينين حقيقي مشعلداري اولان آذربايجان دموکرات فرقه سي٠ اون ايکي شهريور ۱۳۲٤- جي ايل
|
